काठमाडौं । पछिल्ला दिनहरूमा सेयर बजार लगातार ओरालो लागेको छ । गत साताको मंगलबारदेखि ओरालो लागेको नेप्से परिसूचक हालसम्म रोकिएको छैन ।
नेपाल स्टक एक्सचेन्ज नेप्सेका अनुसार आज (मंगलबार) पनि नेप्से परिसूचक १०.१० अंक घटेर १८३७.७१ विन्दुमा रोकिएको हो । यस दिन नेप्से घटेपनि कारोबार रकममा भने सुधार देखिएको छ । एक अर्ब ५४ करोड ४९ लाख रुपैयाँको सेयर कारोबार भएको नेप्सेले जनाएको छ ।
सोमबार भने एक अर्ब एक अर्ब १९ करोड ७२ लाख रुपैयाँको सेयर कारोबार भएको थियो ।
घटेको बजारमा विशाल बजार कम्पनीका सेयरधनीले सर्वाधिक गुमाएका छन् । यो कम्पनीका सेयरधनीले प्रतिकित्ता ३५९ रुपैयाँ ४० पैसा गुमाएका हुन् । यो कम्पनीको सेयर मूल्य तीन हजार ४१० रुपैयाँ ६० पैसा कायम भएको छ ।
सर्वाधिक सेयर मूल्य वृद्धि सिंगटी हाइड्रो इनर्जी लिमिटेडको भएको छ । यो कम्पनीको सेयर मूल्य १० प्रतिशतले बढेर प्रतिकित्ता २७५ रूपैयाँ कायम भएको छ ।
माउन्टेन इनर्जी नेपाल लिमिटेडको सर्वाधिक मूल्यको सेयर खरिद–बिक्री भएको छ । यो कम्पनीको ३६ करोड २९ लाख रुपैयाँको सेयर खरिद–बिक्री भएको छ ।
कारोबारमा आएका १३ समूहमध्ये जीवन बिमा समूहको परिसूचक बढेको छ भने बाँकी समूहको परिसूचक घटेको छ । यसदिन २९२ धितोपत्रको ४६ लाख ९८ हजार ६८२ कित्ता खरिद–बिक्री भएको छ ।
