काठमाडौं । नेपाल सुपर लिग (एनएसएल)को दोस्रो संस्करणमा झापा एफसी र साविक विजेता काठमाडौं रेजर्सले गोलरहित बराबरी खेल्दै अंक बाँडेका छन् ।

सोमबार त्रिपुरेश्वरस्थित दशरथ रंगशालामा भएको खेलमा दुवै टिमले राम्रो आक्रमण बुन्न नसक्दा गोलरहित बराबरीमा रोकिए ।

खेलको २७औँ मिनेटमा झापाको गोललाई फाउल भएको भन्दै रेफ्रीले मान्यता दिएनन् । रक्षक अमित तामाङले अर्का रक्षक आन्द्रेश नियालाई दिएको पास विफल भएपछि झापाले काउन्टर अवसर सृजना गरेको थियो ।

मिडफिल्डर प्रदीप लामाको पासमा फरवार्ड जोर्ज सान्चेजको प्रहार अभिषेक बरालले नियन्त्रणमा लिए पनि उनको हातबाट बल फुत्किएको थियो । सोही क्षण अभिषेकमाथि समीराजबाट फाउल हुँदा बलले जाली चुमेको थियो । 

यसबाहेक, खेलमा अरु गतिलो आक्रमण बन्न सकेन ।

यो बराबरीसँगै तीन खेललबाट पाँच अंक जोडेको साविक विजेता काठमाडौं तालिकाको चौथो स्थानमा यथावत् छ । काठमाडौंले यसअघि पहिलो खेलमा इलामलाई पराजित गर्दा दोस्रो खेलमा चितवनसँग बराबरी खेलेको थियो । 

समान खेलबाट दुई अंक जोडेको झापा तालिकाको आठौँ स्थानमा छ । झापा आफ्नो पहिलो खेलमा इलामसँग १–० ले पराजित हुँदा दोस्रो खेलमा पोखरा थन्डर्सविरुद्ध १–१ को बराबरीमा रोकिएको थियो ।

मंसिर ८ गतेदेखि सुरु भएको प्रतियोगितामा नौ टिमको सहभागिता छ ।

प्रतियोगिताको यस सिजन काठमाडौं रेजर्स, धनगढी एफसी, एफसी बुटवल लुम्बिनी, स्पोर्टिङ इलाम डे मेची एफसी, चितवन एफसी, झापा एफसी, वीरगन्ज एफसी, ललितपुर सिटी एफसी, बुटवल लुम्बिनी र पोखरा थन्डर्स सहभागी छन् ।

एनएसएलको पहिलो संस्करणको उपाधि काठमाडौं रेजर्सले जितेको थियो । 

आयोजक नेपाल स्पोर्ट्स एन्ड इभेन्ट म्यानजमेन्टले प्रतियोगिताका लागि साधारणतर्फ २०० र विशिष्टतर्फ ५०० रुपैयाँ टिकट मूल्य तय गरेको छ ।