काठमाडौं । नेपाल सुपर लिग (एनएसएल)को दोस्रो संस्करणमा झापा एफसी र काठमाडौं रेजर्सबीचको पहिलो हाफ गोलरहितमा सकिएको छ ।

त्रिपुरेश्वरस्थित दशरथ रंगशालामा जारी खेलको पहिलो हाफमा दुवै टिमले बलियो आक्रमण बुन्न सकेनन् ।

२७औँ मिनेटमा झापाको गोललाई फाउल भएको भन्दै रेफ्रीले मान्यता दिएनन् । रक्षक अमित तामाङले अर्का रक्षक आन्द्रेश नियालाई दिएको पास विफल भएपछि झापाले काउन्टर अवसर सिर्जना गरेको थियो । मिडफिल्डर प्रदीप लामाको पासमा फरवार्ड जोर्ज सान्चेजको प्रहार अभिषेक बरालले नियन्त्रणमा लिए पनि उनको हातबाट बल फुत्किएको थियो । सोही क्षण अभिषेक समीराजबाट फाउल हुँदा बलले जाली चुमेको थियो ।

मंसिर ८ गतेदेखि सुरु भएको प्रतियोगितामा नौ टिमको सहभागिता छ ।

प्रतियोगिताको यस सिजन काठमाडौं रेजर्स, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगन्ज एफसी, ललितपुर सिटी एफसी, बुटवल लुम्बिनी र पोखरा थन्डर्स सहभागी छन् ।

एनएसएलको पहिलो संस्करणको उपाधि काठमाडौं रेजर्सले जितेको थियो । 

आयोजक नेपाल स्पोर्ट्स एन्ड इभेन्ट म्यानजमेन्टले प्रतियोगिताका लागि साधारणतर्फ २०० र विशिष्टतर्फ ५०० रुपैयाँ टिकट मूल्य तय गरेको छ ।