काठमाडौं । भौतिक पूर्वाधार तथा यातायातमन्त्री प्रकाश ज्वालाले जुनसुकै विकल्प रोजेर भए पनि निर्माण व्यवसायीहरूको रकम भुक्तानी गर्ने बताएका छन् । शनिबार काठमाडौंमा आयोजित नेपाल आर्थिक पत्रकार संघ (नाफिज)को १४ औं वार्षिक साधारणसभालाई सम्बोधन गर्दै उनले गत आर्थिक वर्षको बाँकी रकम भुक्तानी दिएमात्रै अर्थतन्त्र चलायमान हुने बताए । 

अहिले पनि अर्थतन्त्र संकटमा रहेको उनको भनाइ छ । मन्त्री ज्वालाले आफू बच्नका लागि अर्थतन्त्र राम्रो छ भने पनि अर्थतन्त्र संकटमा रहेको तर भयावह अवस्था भने नरहेको स्पष्ट पारे । उनले अर्थतन्त्र धेरै नै दबाबमा छ भनेर निराशा फैल्याउन नहुने पनि बताए । 

“अघिल्लो आर्थिक वर्षको भुक्तानी जुनसुकै अवस्थामा जस्तो सुकै विकल्प रोजेर भए पनि दिनुपर्छ । त्यसो भयो भने अर्थतन्त्र चलायमान हुन्छ,” उनले भने, “मन्त्रालयले यसका लागि धेरै प्रयत्न गरेपछि धेरै भुक्तानी गर्न सकियो । केही बाँकी छ, त्यो पनि चाँडै भुक्तानी हुनेछ ।” 

मन्त्री ज्वालाले लगानी बढाउन लगानी सम्मेलन फलदायी बनाउनुपर्ने आवश्यकता रहेको बताए । लगानी सम्मेलनअघि उद्योगी व्यवसायीसँग छलफल गरेर सुझाव लिने सरकारको योजना रहेको उनको भनाइ छ ।