काठमाडौं । अमाथ ड्वको निर्णायक गोलप्रेरित स्पोर्टिङ इलाम डे मेची एफसीले नेपाल सुपर लिग (एनएसएल)को दोस्रो संस्करणमा झापा एफसीविरुद्ध १–० को कठिन जित निकालेको छ ।

त्रिपुरेश्वरस्थित दशरथ रंगशालामा सम्पन्न खेलमा निर्धारित समय सकिन चार मिनेट बाँकी रहँदा ड्वले गरेको गोल निर्णायक बनेपछि इलामले प्रतियोगितामा पहिलो जित निकालेको हो ।

८६औँ मिनेटमा ड्वले गोल गर्दै इलामलाई अग्रतामा राखेका थिए । काउन्टरमा फोडे कामाराले एक्लै बल बढाउँदै पेनाल्टी क्षेत्रमा भरत खवासलाई खोजेका थिए । भरतले निकालेको पासमा ड्वले सशक्त प्रहार गरे पनि झापाका गोलकिपरले त्यसलाई बचाएका थिए । तर, सोही रिबाउन्डमा ड्वले नै बललाई जाली चुमाएपछि इलामले ‘डेडलक’ तोडेको थियो ।

त्यसअघि, खेलभर दुवै टिमले आधा दर्जन उत्कृष्ट अवसर गुमाएका थिए । खेलको ११औँ मिनेटमा झापाका ओर्गे सान्चेजले अग्रताको सुन्दर अवसर खेर फाले । छिरिङ लामाले राइट साइडबाट निकालेको लामो पासलाई मध्यभागबाट नियन्त्रणमा लिएर अघि बढाए पनि इलामका गोलकिपर विकेश कुथुसँग ‘वान भर्सेस वान’मा गरेको प्रहार पोस्टको नजिकैबाट बाहिरियो ।

२९औँ मिनेटमा इब्राहिम जितेले लेफ्ट साइडबाट गरेको सशक्त प्रहार टार्गेटमा रहन नसक्दा स्पोर्टिङ इलामले अग्रता बनाउन सकेन । ४४औँ मिनेटमा अञ्जन बिष्टको हेडर बारमा लागेर फर्किदा झापाले अग्रताको सुन्दर अवसर गुमायो । राइट साइडबाट छिरिङले गरेको क्रसमा १८ यार्ड बक्सभित्रका अञ्जनको सुन्दर हेडर बारमा लागेर फर्किएको थियो ।

दोस्रो हाफको पहिलो मिनेटमै अमाथ ड्वले गोलको मौका खेर फालेपछि इलामले अग्रताको अवसर गुमाएको थियो । भरत खवासले लेफ्ट साइडबाट गरेको क्रस पेनाल्टी क्षेत्रमा नियन्त्रणमा राखे पनि ‘कन्ट्रोल’ सही हुन नसक्दा झापाका गोलकिपर स्टेफन कुपिकले खतरा टारे ।

५४औँ मिनेटमा झापाका ओर्गे सान्चेजले गोलको अर्को सुन्दर मौका खेर फाले । लेफ्ट साइडबाट सुरज बिष्टले गरेको क्रसमा सान्चेजको हेडर इलामका गोलकिपर विकेश कुथुले मुश्किलले बचाएका थिए । लगत्तै अर्को मिनेटमा सान्चेजले नै गोलको अर्को मौका पनि सदुपयोग गर्न सकेनन् । अञ्जन बिष्टले पेनाल्टी बक्सबाहिरबाट आभास लामिछानेलाई बल निकालेका थिए । आभासले बल नियन्त्रणमा राख्दै पेनाल्टी बक्सभित्रै रहेका सान्चेजलाई पास दिए पनि उनको पहिलो प्रयास पुनः एकपटक इलामका कप्तान विकेशले विफल बनाए ।

६२औँ मिनेटमा इलामका अमाथ ड्वले अग्रताको अवसर खेर फाले । दीपेश घलेले रक्षापंक्तिको राइट साइडबाट निकालेको पासलाई नियन्त्रणम राख्दै ड्वले झापाका दुई रक्षकलाई बिट गर्दै गरेको लोअर प्रहार पोस्ट नजिकैबाट बाहिरिएको थियो ।

६८औँ मिनेटमा इलामको प्रहार बारमा लागेर फर्किएपछि इलाम पुनः अग्रता लिनबाट चुकेको थियो । आशिष गुरुङले लेफ्ट साइडबाट गरेको क्रसमा अब्डोल्गे बाको भली पोस्टमा लागेर फर्किएको थियो । सोही रिबाउन्डमा फोडे कामाराले गरेको प्रहार झापाका गोलकिपर स्टेफन कुपिकले बचाएका थिए । पुनः आएको रिबाउन्ड फोडेले बक्सभित्रका दीपेशलाई निकालेका थिए । पहिलो टचमै पोस्टको दिशा दिन खोजे पनि दीपेशको प्रहार बारमाथिबाट बाहिरिएपछि झापाको खतरा टरेको थियो ।

७०औँ मिनेटमा झापाका सान्चेजको प्रहारले जाली चुम्न सकेनन् । समन्दर ओकिलोभ निकालेको बल १८ यार्ड बक्सबाट निकालेको बल सान्चेजले नियन्त्रणमा लिँदै ‘टर्न’ गरेर लिएको प्रहार इलामका गोलकिपर विकेशले मुश्किलले जोगाए ।

८२औँ मिनेटमा अमाथ ड्वले पेनाल्टी सदुपयोग गर्न नसक्दा इलामले अर्को सुनौलो अवसर खेर फाल्यो । झापाका योगेश गुरुङले १८ यार्ड बक्सभित्र भरत खवासलाई लडाएपछि इलामले पेनाल्टीको अवसर पाएको थियो । तर, प्रहारका लागि आएका ड्वले त्यसको सदुपयोग गर्न नसक्दा इलामले अग्रताको अवसर खेर फालेको थियो ।

प्रतियोगितामा इलामको यो पहिलो जित हो । यसअघि, इलाम पहिलो खेलमा काठमाडौं रेजर्ससँग १–० ले पराजित भएको थियो । झापाको भने यो प्रतियोगिताको पहिलो खेल हो ।

मंसिर ८ गतेदेखि सुरु भएको प्रतियोगितामा कुल नौ टिमको सहभागिता छ । प्रतियोगिताको यस सिजन काठमाडौं रेजर्स, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगन्ज एफसी, ललितपुर सिटी एफसी, बुटवल लुम्बिनी र पोखरा थन्डर्सले खेलिरहेका छन् ।

प्रतियोगिताको पहिलो संस्करणको उपाधि काठमाडौं रेजर्सले जितेको थियो ।

प्रतियोगिताका सबै खेल त्रिपुरेश्वरस्थित दशरथ रंगशालामा हुनेछ । आयोजक नेपाल स्पोर्ट्स एन्ड इभेन्ट म्यानजमेन्टले प्रतियोगिताका लागि साधारणतर्फ ३०० र विशिष्टतर्फ ५०० रुपैयाँ टिकट मूल्य तय गरेको छ ।