काठमाडौं । सभामुख देवराज घिमिरेले संसद् र समितिका काम–कारबाही अतिरिक्त समयमा सञ्चालन गर्न सरकारले बजेट विनियोजनमा नियन्त्रण गरेको बताएका छन् । सोमबार संसदीय समितिका सभापतिहरूसँग सिंहदरबारमा छलफल गर्दै उनले यस्तो बताएका हुन् ।

उनले संसद् र संसदीय समितिका बैठक कार्यालय समयमै राख्न अर्थमन्त्री डा. प्रकाशशरण महतले आग्रह गरेको जानकारी गराए । नियमित समयबाहेक बैठक राख्दा अतिरिक्त सुविधा नदिइएको गुनासो कर्मचारीले गरेको उनले सुनाए ।

विगतमा संसद्लाई विभिन्न विदेशी एवं दातृनिकायबाट सहयोग प्राप्त हुने गरेको उनले बताए । पछिल्लो समय सहयोग घट्दै गएको उनले उल्लेख गरे । कतिपय सहयोग नेपालका निम्ति उपयुक्त नभएकाले पनि कम बन्दै गएको उनको भनाइ छ ।

बजेटको अभावमा सभा प्रभावकारी हुन नसकेको भन्दै उनले सरकारले संसद्लाई चलायमान र प्रभावकारी बनाउन आवश्यक बजेट विनियोजन गर्नुपर्नेमा जोड दिए ।

विगतका बैठकमा कर्मचारीलाई अतिरिक्त समयको भत्ता दिन नसकिएको भन्दै उनले यसलाई व्यवस्थित नगरिए संसद् र संसदीय समिति चल्न कठिन रहेको बताए ।

सभामुख घिमिरेले संसदीय समितिहरूमा विषयवस्तु दोहोरिने र कार्यक्षेत्र स्पष्ट नहुने समस्या रहेको पनि बताए । कार्यक्षेत्र र विषयवस्तुमा समस्या भए छलफल गरी समाधान गर्नुपर्नेमा सोच्न उनले समिति सभापतिहरूलाई निर्देशन दिए ।

त्यस्तै सभामुख  घिमिरेले संसदीय समितिहरु क्रियाशील बनाउन सभापतिहरुलाई निर्देशन दिएका छन् ।

सभामुखको कार्यकक्ष सिंहदरबारमा समितिका सभापतिहरुको संयुक्त बैठकमा प्रमुख सचेतकमार्फत गाउँ पुगेका सांसदहरुलाई बोलाएर समिति क्रियाशील बनाउन निर्देशन दिएका हुन् ।

“विधेयकका काम छिटो गर्नुपर्‍यो । सबै गाउँतिर गएका छन् । निर्वाचन क्षेत्र पूर्वाधारको कुरा के हो । संसद्ले पारित गर्‍यो, अदालतले रोकेको छ,” संयुक्त बैठकमा उठेका विषयहरुका बारेमा जानकारी गराउँदै समिति सभापति रामहरि खतिवडाले भने । 

उनका अनुसार प्रमुख सचेतकमार्फत् सांसदहरु बोलाएर समितिका बैठक छिटो गर्न सभामुखले निर्देशन दिएका थिए ।

बैठकमा सरकारले संसद्लाई बिजनेस नदिएको, बेवास्ता गरेको, अर्थतन्त्र समस्यामा हुँदा पनि बेवास्ता गरेको भन्दै केही सभापतिहरुले आलोचना गरेका थिए ।