काठमाडौं । नेपालको गार्मेन्ट र गलैँचा निर्यात केही दशकअघिको पहिचान थियो । नेपालबाट अमेरिकामा यस्ता सामग्री निर्यातका लागि ‘कोटा’ नै तोकिएको थियो । विसं. २०५७–५८ तिर एउटै कम्पनीले एक करोड ४३ लाख अमेरिकी डलरबराबरसम्म निर्यात गरेको थियो ।

तर पछिल्ला केही दशकमा गार्मेन्ट उत्पादित सामग्री अधिकांश आयात हुन थाले न्युनरूपमा मात्रै निर्यात भइरहेको छ । नेपाललाई पुरानै अवस्थामा फर्काएर नेपालबाट तयारी पोशाक अमेरिका र युरोपका बजारमा पुर्‍याउने लक्ष्यसहित भाटभटेनी समूहले तयारी थालेको छ ।

भाटभटेनीका अहिले देशभर २८ वटा सुपरस्टोर सञ्चालनमा छन् । त्यसबाहेक होटल, हाइड्रोमा पनि लगानी रहेको छ ।  भाटभटेनीका अध्यक्ष मीनबहादुर गुरुङको नेतृत्वमा रहेको अन्य व्यवसायीहरुको समूहले ‘गार्मेन्ट उद्योग’ सञ्चालनमा ल्याउन लागेको हो ।

त्यसका लागि बुधबार भैरहवामा भूमि पूजा गर्दै शिलान्यास गरिएको छ । समूहमा व्यवसायी उमेश श्रेष्ठ, रामकृष्ण खतिवडा, किरण श्रेष्ठलगायत रहेका छन् । भैरहवास्थित विशेष आर्थिक क्षेत्र ‘सेज’मा उद्योग स्थापना हुनेछ ।

बाह्रखरीसँग कुरा गर्दै अध्यक्ष मीनबहादुर गुरुङले एक अर्ब ५० करोड लगानीमा उद्योग स्थापना गर्न लागिएको जानकारी गराए । “हामीले एक सय ५० करोड लगानी गर्दैछौँ,” उनले भने, “यहाँबाट उत्पादित सामान अमेरिका र युरोपका बजारमा पुर्‍याउने लक्ष्य लिएका छौँ ।”

उनले भाटभटेनीका स्टोरहरुमा पनि यस उद्योगबाट उत्पादित सामग्री पाइने र स्थानीय बजारमा पनि पुर्‍याउनले लक्ष्य राखिएको जानकारी गराए ।

“हामीले भाटभटेनीमा आफ्नै उत्पादन बिक्रीको लक्ष्य राखेका छौँ,” उनले भने, “स्थानीय बजारमा पनि पठाउछौँ ।”

१० महिनाभित्रै कम्पनी सञ्चालनमा आउनेछ । 

“हामीलाई चाहिने केही कच्चा पदार्थ भारत र चीनबाट आयात गर्छौं,” उनले भने, “कम्पनी सञ्चालनमा आउनुअघि विश्वका ठूला यस्ता कम्पनीबाट विज्ञलाई ल्याएर यहाँ तालिमको व्यवस्था गर्दैछौँ ।”

उनले १० महिनाभित्रै एक हजार दुई सयलाई रोजगारी दिने बताउँदै भने, “त्यसबाहेक पनि हामीले रोजगारीलाई प्राथमिकतामा राखेका छौँ ।”