![सूर्यविनायक–रत्नपार्कमा पुनः द्रुत बस सेवा](https://12khari.top/uploads/posts/druta-bus5-1695199113.jpg)
काठमाडौं । सूर्यविनायक–रत्नपार्क रुटमा एक महिना सञ्चालन भएर बन्द गरिएको द्रुत बस सेवा आइतबारदेखि पुनः सञ्चालन भएको छ ।
आइतबारदेखि प्रत्येक दिन बिहान ८ः३० बजेदेखि तीन/तीन मिनेटको फरकमा सूर्यविनायक–रत्नपार्कका निम्ति बस छुट्ने यातायात व्यवस्था विभागका महानिर्देशक उद्धवप्रसाद रिजालले जानकारी दिए ।
“रत्नपार्क–सूर्यविनायक रुटमा ३६ बस सञ्चालन हुनेछन्,” उनले भने, “आज बिहान साढे ८ बजेदेखि बस नियमित सञ्चालन गरिएको छ ।” यसअघि, उक्त रुटका दुवैतर्फ गरी २५ बस सञ्चालन गरिएको थियो
बस सेवा बिहान १०ः३० सम्म र दिउँसो ३ः३० देखि ५ः३० बजेसम्म सञ्चालनको तालिका बनाइएको महानिर्देशक रिजालले जानकारी दिए ।
उनका अनुसार द्रुत बस सेवालाई थप प्रभावकारी बनाउन बस थपिएको र समय तालिकामा पनि केही संशोधन गरिएको छ ।
यात्रीलाई छिटो गन्तव्यमा पुग्न सहज होस् भनेर भौतिक पूर्वाधार तथा यातायात मन्त्रालयले संविधान दिवसको अवसर पारेर गएको असोज ३ गतेदेखि उक्त बस सेवा सुरु गरेको थियो । सेवा प्रभावकारी नभएपछि एक महिनामै स्थगित गरिएको थियो ।
अरू सार्वजनिक बसलाई रत्नपार्क–सूर्यविनायक पुग्न डेढ घण्टा लाग्ने गरेकामा द्रुत बसलाई ४५ मिनेट लाग्ने रिजालले दाबी गरे । माइतीघर, कोटेश्वर, जडीबुटीलगायत ट्राफिक जाम बढी हुने चोकमा पनि द्रुत सेवाका बस रोकिन नपर्ने गरी ट्राफिक प्रहरीले सहयोग गर्ने उनको भनाइ छ ।
रत्नपार्क–सूर्यविनायक रुटमा अरू सार्वजनिक बसले जति भाडा लिन्छन्, द्रुत बसमा पनि त्यति नै भाडा लाग्ने यातायात व्यवस्था विभागले जनाएको छ । रासस