काठमाडौं । केपी ओली कप राष्ट्रिय ट्वान्टी–२० क्रिकेट प्रतियोगिता–२०८० मा सन्दीप लामिछानेको कप्तानीमा रहेको वाग्मती प्रदेशले लगातार दोस्रो जित निकालेको छ । 

शुक्रबार कास्कीस्थित पोखरा क्रिकेट मैदानमा सम्पन्न समूह ‘ए’ को खेलमा वाग्मतीले कर्णाली प्रदेशविरुद्ध ९० रनको सहज जित निकालेको हो । यो जितसँगै वाग्मतीले प्रतियोगिताको सेमिफाइनलमा स्थान बनाएको छ ।

वाग्मतीले प्रस्तुत गरेको १९० रनको लक्ष्य पछ्याउने क्रममा कर्णालीले १७.३ ओभरमा सबै विकेट गुमाएर ९९ रनमात्र जोड्न सक्यो ।

कर्णालीका अर्जुन घर्तीले २४ रन बनाए । विपीन शाहीले २१, कप्तान रविन्द्र शाहीले २० र दीपेन्द्र रावतले १२ रन थपे । यसबाहेक, अन्य ब्याटरले दोहोरो अंकमा रन जोड्न सकेनन् ।

कर्णालीलाई सस्तैमा समेट्न वाग्मतीका कप्तान लामिछानले चार विकेट लिए । ३.३ ओभर बलिङ गरेका सन्दीपले नौ रन खर्चिए । दीपेश श्रेष्ठले दुई विकेट लिँदा इशान पाण्डे, सुवास खत्री, रिजन ढकाल र प्रतिश जिसीले समान एक विकेट लिए ।

त्यसअघि टस जितेर ब्याटिङमा आएको वाग्मतीले निर्धारित २० ओभरमा ६ विकेट गुमाएर १८९ रनको योगफल खडा गरेको थियो । 

वाग्मतीका ओपनर रित गौतमले ८२ रन बनाए । रितले ५९ बलमा १० चौका र दुई छक्का प्रहार गरे । इशान पाण्डेले ३८ बलमा चार चौका र ६ छक्कासहित ७० रन थपे । १६–१ को स्थितिबाट यी दुईले १४३ रनको साझेदारी गर्दै वाग्मतीको इनिङ सम्हालेका थिए । प्रतिशले १२ रन जोडे ।

कर्णालीका दिनेश अधिकारीले तीन विकेट लिए । दिवन पुन र अनुज चनराले समान एक विकेट लिए ।

यसअघि वाग्मतीले पहिलो खेलमा आयोजक मदन भण्डारी स्पोर्ट्स क्लब रातोविरुद्ध १०९ रनको फराकिलो जित निकालेको थियो ।