काठमाडौं । यमनविरुद्धको खेल हेर्न आउने दर्शकलाई खेलपछि घर फर्किन अखिल नेपाल फुटबल संघ (एन्फा) कम्तीमा १५ वटा बसको व्यवस्था गर्ने भएको छ ।

नेपालले फिफा विश्वकप–२०२६ छनोटको दोस्रो चरणमा भोलि (मंगलबार) यमनसँग त्रिपुरेश्वरस्थित दशरथ रंगथशालामा प्रतिस्पर्धा गर्दै छ । यी दुई टिमबीचको खेल साँझ ७ बजेदेखि सुरु हुने हुँदा खेल हेर्न रंगशाला आएका दर्शकलाई घर फर्किन कम्तीमा १५ वटा बसको व्यवस्था गर्ने जनाएको हो ।

“खेल साँझ ७ बजेदेखि सुरु हुने हुँदा दर्शकलाई घर फर्किन सहज होस् भनेर हामीले कम्तीमा १५ बसको व्यवस्था मिलाउँदै छौँ । आवश्यक परेको खण्डमा अरु बस थपिनेछन् । तर, दर्शकहरूले एन्फाले व्यवस्था गरेको बसमा चढ्नका लागि खेल हेरेको टिकटको अर्धकट्टी साथमा राखेको हुनुपर्छ,” खेलको पूर्वसन्ध्यामा आयोजित पत्रकार सम्मेलनमा विश्वकप छनोटका संयोजक एन्फा उपाध्यक्ष दीपक खतिवडाले भने ।

नेपालमा यसअघि साँझका खेल अपरान्ह ५ बजेपछि सुरु हुने गरे पनि नेपाली टिमका मुख्य प्रशिक्षक भिन्चेन्सो अल्बर्टो एनेसको आग्रहमा यसपटक खेलको समय साँझ ७ बजे राखिएको हो । दशरथ रंगशालामा हुने खेलका लागि एन्फाले साधारण प्यारापिटतर्फ ३०० र विशिष्टतर्फ एक हजार रुपैयाँ टिकट मूल्य तोकेको छ । एन्फाले यमनसँगको खेल सञ्चालनका लागि ७३ लाख ६८ हजार ४०० रुपैयाँ खर्च हुने जनाएको छ ।

छनोटको दोस्रो चरणमा नेपाल समूह ‘एच’ मा छ । यस समूहमा नेपालसँगै यमन, युनाइटेड अरब इमिरेट्स (यूएई) र बहराइन छन् । यसअघि पहिलो खेलमा नेपाल यूएईसँग उसैको मैदानमा ४–० ले पराजित भएको थियो ।