विराटनगर । मोरङका विभिन्न स्थानमा विशेष अभियान संचालन गरी प्रहरीले लुटपाट गर्ने गिरोहका व्यक्तिहरूलाई पक्राउ गरेको छ । 

गत भदौको तेस्रो सातासम्म अभियान संचालन गरी प्रहरीले जिल्लाका विभिन्न स्थानहरूमा पेस्तोल, रड, लाठी लगायतका हातहतियार देखाइ कुटपिट गरी श्रंखलाबद्ध रूपमा लुटपाट गर्ने गिरोहलाई नियन्त्रणमा लिइएको मोरङ प्रहरीले जनाएको छ ।

प्रहरीले घरमा लुकाई छिपाई राखेको अवस्थामा कटुवा पेस्तोल एक थान, प्रहरीबाट लुटिएको चाइनिज पेस्तोल एक थान, मोबाइल १६ थान, मेमोरीकार्ड १२ थान बरामद गरेको छ ।  

त्यस्तै, नेपाली नगद एक लाख ७५ हजार २७५ रुपैयाँ, भारतीय नगद ११ हजार ६०० र मोटरसाइकल दुई थान समेत बरामद गरिएको जिल्ला प्रहरी कार्यालय मोरङका प्रवक्ता रन्जनकुमार दाहालले जानकारी दिए ।  

डाँका चोरी र संगठित अपराध मुद्दामा जिल्ला अदालत मोरङको आदेशबाट मोरङ बुढीगंगा गाउँपालिका–५ बस्ने २४ वर्षीय मनजरूल मियाँ, वडा नम्बर ४ मा बस्ने ४० वर्षीय रिजवान मियाँ, सुनसरीको दुहवी नगरपालिका–१ बस्ने ३१ वर्षीय मोहमद अलि मुरताजा मियाँ, ३० वर्षीय नजरूल मियाँ र दुहवी नगरपालिका–६ बस्ने ४० वर्षीय मो. आलम पुर्पक्षको लागि कारागार चलान भएका छन् । 

आपराधिक कार्यमा सहयोग गर्ने मोबाइल पसल संचालक ३० वर्षीय सिजाम आलम एक लाख रुपैयाँ धरौटी बुझाएर छुटेका छन् ।