काठमाडौं । नेपाल क्रिकेट संघ (क्यान)ले टी–२० विश्वकपमा छनोट हुन सफल टिमलाई नगद पुरस्कारले सम्मान गर्ने भएको छ ।

आज बसेको संघको केन्द्रीय कार्य समितिको बैठकले सन् २०२४ मा वेस्टइन्डिज र अमेरिकामा हुने विश्वकपमा छनोट हुन सफल टिमलाई ५० लाख रुपैयाँ नगदबाट सम्मान गर्ने निर्णय गरेको हो ।

बैठकले पुरुषतर्फ एसीसी यू–१९ प्रिमियर कपबाट सन् २०२४ मा हुने यू–१९ एसिया कपमा छनोट हुन सफल टिमलाई पनि नगदबाट सम्मान गर्ने निर्णय गरेको छ । यू–१९ टिमका खेलाडीले जनही ५० हजार रुपैयाँ पाउने छन्  ।

बैठकले नेपाली महिला टिमलाई हङकङमा हुने महिला ट्वान्टी–२० शृङ्खलामा सहभागी गराउने निर्णय गरेको छ । हङकङमा नोभेम्बर १५ देखि १९ सम्म हुने शृङ्खलामा चार टिम सहभागी हुने क्यानले जनाएको छ । 

यस्तै, क्यानले जाजरकोट भूकम्पबाट पीडितहरूको उद्धारका लागि सहयोगस्वरूप रकम उपलब्ध गराउने निर्णय पनि पारित गरेको छ । यसअघि क्यानले जाजरकोट भूकम्पबाट पीडितहरूको उद्धारका लागि आईसीसी ट्वान्टी–२० विश्वकप एसिया छनोटको फाइनलमा उठेको टिकट रकममध्ये ५० प्रतिशत दिने जनाएको थियो ।