काठमाडौं । साविक विजेता इंग्ल्यान्ड भारतमा जारी आईसीसी एकदिवसीय विश्वकपको लिग चरणबाटै बाहिरिने निश्चित भएको छ ।

शनिबार अहमदाबादस्थित नरेन्द्र मोदी रंगशालामा सम्पन्न खेलमा अस्ट्रेलियासँग ३३ रनले पराजित भएसँगै साविक विजेताको चुनौती लिग चरणबाटै समाप्त हुने पक्का भएको हो ।

खेलमा टस हारेर ब्याटिङमा आएको अस्ट्रेलियाले ४९.३ ओभरमा सबै विकेट गुमाएर २८६ रनको योगफल खडा गरेको थियो । २८७ रनको लक्ष्यसहित मैदान उत्रिएको इंग्ल्यान्डले ४८.१ ओभरमा सबै विकेट गुमाएर २५३ रनमात्र जोड्न सक्यो ।

इंग्ल्यान्डका बेन स्टोक्सले ६४ रन बनाए पनि टिमको हार टार्न सकेनन् । डेविड मलानले ५० रन थपे । मोइन अलीले ४२, क्रिस वोक्सले ३२, आदील राशिदले २०, डेविड विलीले ३२ र जोय रुटले १३ रन जोडे ।

अस्ट्रेलियाका एडम जाम्पाले तीन विकेट लिए । १० ओभर बलिङ गरेका जाम्पाले २१ रनमात्र खर्चिए । मिचेल स्टार्क, जस हेजलवुड र प्याट कुमिन्सले समान दुई विकेट लिए । मार्कुस स्टोइनिसले एक विकेट हात पारे ।

त्यसअघि पहिले ब्याटिङमा आएको अस्ट्रेलियाबाट मार्नुस लाबुसचेनले ७१ रन बनाए । क्यामरुन ग्रीनले ४७, स्टिभ स्मिथले ४४, मार्कुस स्टोइनिसले २५ र एडम जाम्पाले २९ रन जोडे । यस्तै, डेविड वार्नरले १५ र ट्राभिस हेडले ११ रन जोड्दा कप्तान प्याट कुमिन्स र मिचेल स्टार्कले समान १० रन थपे ।

इंग्ल्यान्डका क्रिस वोक्सले चार विकेट लिए । मार्क वुड र आदील राशिदले समान दुई विकेट लिए । डेविड विली र लियम लिभिङस्टोनले एक–एक विकेट लिए ।

जितसँगै सात खेलबाट १० अंक जोडेको अस्ट्रेलिया सेमिफाइनलको नजिक पुगेको छ । यता, प्रतियोगितामा लगातार पाँचौ हार बेहोरेको इंग्ल्यान्ड भने दुई खेल बाँकी रहँदै लिग चरणबाट बाहिरिने निश्चित बनेको छ । इंग्ल्यान्डले सात खेल खेल्दा दुई अंक जोडेको छ ।

शनिबार नै भएको अर्को खेलमा साविक उपविजेता न्युजिल्यान्डविरुद्ध डकवर्थ लुइस पद्धति (डीएलएस) अनुसार २१ रनको जित निकाल्दै पाकिस्तानले भने अन्तिम चारको सम्भावनालाई कायम राखेको छ ।

बेंगलुरुस्थित एम चिन्नास्वामी रंगशालामा भएको खेलमा टस हारेर ब्याटिङमा आएको न्युजिल्यान्डले निर्धारित ५० ओभरमा ६ विकेट गुमाएर ४०१ रनको योगफल खडा गरेको थियो । तर, पाकिस्तानले २१.३ ओभरमा एक विकेट गुमाएर १६० रन बनाउँदा वर्षा भएपछि खेल रोकिएको थियो ।

खेल पुनः सुरु हुँदा पाकिस्तानले ४१ ओभरमा पाकिस्तानले ३४२ रनको लक्ष्य पाएको थियो । तर, २५.३ ओभरमा एक विकेट गुमाएर २०० रन बनाउँदा पुनः वर्षा भएपछि पाकिस्तान डिएलएसअनुसार २३ रनले विजयी भएको हो ।

जितसँगै आठ खेलबाट आठ अंक जोडेको पाकिस्तान तालिकाको पाँचौँ स्थानमा छ । समान खेलबाट समान अंक रहे पनि नेट रनरेटका आधारमा न्युजिल्यान्ड चौथो स्थानमा छ ।