काठमाडौं । गैरआवासीय नेपाली संघ (एनआरएनए)ले भूकम्प प्रभावितलाई एक करोड रुपैयाँभन्दा बढीको राहत सामग्री वितरण गर्ने भएको छ । भूकम्पले घरबारविहीन भएका स्थानीयलाई त्रिपाल, खाद्यान्न, लत्ताकपडालगायत सामग्रीसहित अध्यक्ष डा. बद्री केसी नेतृत्वको एक टोली प्रभावित क्षेत्रमा जाने भएको हो ।

अध्यक्ष केसीका अनुसार भूकम्प प्रभावित ४०० परिवारलाई संघले राहत सामग्री वितरण गर्न लागेको छ । उनीसहित महासचिव गौरीराज जोशी, उपमहासचिव प्रविण गुरुङ, सचिव मनोज गोर्खाली, सहकोषाध्यक्ष अभिमन्यु बस्नेत, एनसीसी यूएईका अध्यक्ष विकास शाहीलगायत टोली राहत सामग्री लिएर जाजरकोट जान लागेको हो ।

संघले त्रिपाल, खाद्यान्न, ओछ्याउने म्याट्रेस, लगाउने न्यानो कपडा, स्यानिटरी प्याडलगायत सामग्री वितरण गर्ने राहत अभियानलाई संयोजन गरिरहेका संघका सचिव गोर्खालीले बताए ।

“हामी भोलि (आइतबार) नै त्यहाँ पुग्न कोसिस गर्दै छौँ । त्यहाँका पीडित परिवारलाई निरन्तर सहयोग गर्न हामी खटिनेछौँ,” संघका उपमहासचिव गुरुङले भने ।

संघले यसअघि पहिलो चरणमा सरकारको राहत कोषमा १० लाख रुपैयाँ सहयोग गर्ने जनाएको थियो ।

संघले आर्थिक सहयोग संकलन र अरू आवश्यक कार्यमा यथाशक्य छिटो जुट्न सबै राष्ट्रिय समन्वय परिषद्हरू तथा विदेशमा रहेका गैरआवासीय नेपालीलाई आग्रह समेत गरेको छ ।

शुक्रबार राति ११ बजेर ४७ मिनेटमा जाजरकोटको रामीडाँडा आसपास केन्द्रविन्दु भएर गएको ६.४ म्याग्निच्युडको भूकम्पमा परी जाजरकोट र रुकुम पश्चिममा ठूलो जनधनको क्षति भएको छ ।