काठमाडौं । श्रीलंकाविरुद्ध ३०२ रनको फराकिलो जित निकाल्दै घरेलु टिम भारतले आईसीसी एकदिवसीय विश्वकपको सेमिफाइनलमा स्थान निश्चित गरेको छ ।

यो जितसँगै सात खेलबाट १४ अंक जोडेको भारतले लिग चरणको अन्तिम दुई खेल अगावै अन्तिम चारको यात्रा तय गरेको हो ।

बिहीबार मुम्बईस्थित वान्खडे क्रिकेट रंगशालामा सम्पन्न खेलमा टस हारेर ब्याटिङमा आएको भारतले निर्धारित ५० ओभरमा आठ विकेट गुमाएर ३५७ रनको योगफल खडा गरेको थियो । ३५८ रनको लक्ष्यसहित मैदान उत्रिएको श्रीलंका भने १९.४ ओभरमा ५५ रनमै समेटियो ।

श्रीलंकाका कासुन रजिथाले १४ रन जोडे । एन्जेलो म्याथ्युज र महिस थिक्षणाले समान १२ रन थपे । यसबाहेक, अन्य ब्याटर भने दोहोरो अंकमा पनि पुग्न सकेनन् ।

श्रीलंकालाई सस्तैमा समेट्न भारतका मोहम्मद सामीले पाँच विकेट लिए । घातक बलिङ गरेका सामीले पाँच ओभरमा एक मेडन राख्दै १८ रन खर्चिए । मोहम्मद सिराजले तीन विकेट लिँदा जसप्रीत बुमराहर रविन्द्र जडेजाले एक–एक विकेट लिए ।

त्यसअघि भारतका ओपनर सुभमन गिलले ९२ रन बनाएका थिए । विराट कोहली र श्रेयस ऐयरले क्रमशः ८८ र ८२ रन थपे । रविन्द्र जडेजाले ३५, केएल राहुलले २१ र सुर्यकुमार यादवले १२ रन जोडे ।

श्रीलंकाका दिल्सान मदुसंकाले पाँच विकेट लिएका थिए । यस्तै, दुस्मन्था चमिराले एक विकेट हात पारे ।

जितसँगै शीर्ष स्थानमा उक्लिएको भारत सेमिफाइनलमा स्थान निश्चित गर्ने प्रतियोगिताकै पहिलो टिम बनेको छ । सात खेलबाट चार अंक जोडेको श्रीलंका भने तालिकाको सातौं स्थानमा छ ।