काठमाडौं । भौतिक पूर्वाधार तथा यातायातमन्त्री प्रकाश ज्वालाले वर्षाले बिगारेको सडक र खाल्डाखुल्डी ५० प्रतिशत मर्मत गरिएको बताएका छन् ।

प्रतिनिधिसभाअन्तर्गतको पूर्वाधार विकास समितिमा सोमबार उनले आउँदो तिहारअघि नै सम्पूर्ण सडक सञ्जाल मर्मत गरिसक्ने गरी काम भइरहेको बताएका हुन् ।

“दसैँअघि नै सम्पूर्ण सडक सञ्जालको मर्मत गर्ने, खाल्डाखुल्डी पुर्ने योजना मन्त्रालयको थियो । तर, वर्षा नरोकिएका कारण दसैँअघि यो सम्भव भएन,” मन्त्री ज्वालाले भने, “दसैँअघि ५० प्रतिशत मात्र काम गर्न सक्यौँ । बाँकी ५० प्रतिशत सडक तिहारअघि मर्मत गरिसक्छौँ ।”

खासगरी दसैँ–तिहारका बेला सर्वसाधारण यात्रीको सडक सुरक्षा र सहज यातायातको व्यवस्थामा योपटक सरकारले निकै सावधानी अपनाएकाले गम्भीर दुर्घटना नभएको मन्त्री ज्वालाको भनाइ छ ।

विगतमा भन्दा यो वर्ष सहज रूपमा गाडी टिकटको व्यवस्था गरिएको उनले बताए ।