काठमाडौं । कप्तान रोहित शर्माको अर्धशतकप्रेरित भारतले आईसीसी एकदिवसीय विश्वकपमा साविक विजेता इंग्ल्यान्डलाई २३० रनको लक्ष्य दिएको छ ।

आइतबार लखनउस्थित एकाना क्रिकेट रंगशालामा जारी खेलमा टस हारेर ब्याटिङमा आएको भारतले निर्धारित ५० ओभरमा नौ विकेट गुमाएर २२९ रन जोड्यो ।

इंग्लिस बलरसामू दबाबमा देखिएको घरेलु टिमको इनिङ कप्तान रोहितले उकासे । रोहितले १०१ बलमा १० चौका र तीन छक्कासहित ८७ रन बनाए । ४०–३ को कठिन अवस्थामा रहँदा चौथो विकेटका लागि केएल राहुलसँग ९१ रनको साझेदारी गर्दै रोहितले भारतको इनिङ सम्हालेका थिए । राहुलले ३९ रन थपे । यस्तै, सुर्यकुमार यादवले ४९ रन बनाएपछि भारत सम्मानजनक योगफलसम्म पुगेको हो । जसप्रित बुमराहले १६ रन थपे ।

यसबाहेक, ब्याटरबाहेक अन्यले दोहोरो अंकमा रन जोड्न सकेनन् । 

इंल्यान्डका डेविड विलीले तीन विकेट लिए । १० ओभर बलिङ गरेका विलीले दुई मेडन राख्दै ४५ रन खर्चिए । क्रिस वोक्स र आदील रासिदले समान दुई विकेट लिए । मार्क उडले एक विकेट हात पारे ।

अक्टोबर ५ देखि सुरु भएको प्रतियोगितामा भारत हालसम्म अपराजित छ । पाँच खेलबाट १० अंक जोडेको भारत तालिकाको दोस्रो स्थानमा छ । यता, विश्वकपमा खराव लयबाट गुज्रिरहेको साविक विजेता इंग्ल्यान्ड भने पाँच खेलबाट दुई अंकसहित तालिकाको पुछारमा छ ।