काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले बीपी कोइरालाजस्तो बन्न नसकिने बताएका छन् । बीपीलाई पढ्न मात्र सकिने उनको भनाइ छ ।

कोजाग्रत पूर्णिमाका अवसरमा नेपाली कांग्रेसद्वारा आयोजित चियापान कार्यक्रममा सहभागी हुन सानेपा पुगेका लामिछानेले आफूलाई बीपीसँग तुलना नगरिदिन आग्रह गरे ।

कांग्रेस छोडेर तनहुँ–१ को उपनिर्वाचनमा रास्वपाबाट प्रतिस्पर्धा गरेका अर्थविद् डा. स्वर्णिम वाग्लेले लामिछानेलाई बीपीसँग तुलना गरेका थिए । बीपीको व्यक्तित्वसँग आफ्नो तुलना हुनै नसक्ने लामिछानेले बताए ।

“उहाँ (स्वर्णिम वाग्ले)ले हुटहुटीको हिसाबले भन्नुभएको जस्तो लाग्छ, कहिलेकाहीँ हामी स्वभावतः फलानोजस्तो भन्छौँ नि !,” उनले भने, “कहाँ बीपी कहाँ हामी, मलाई त लाग्दैन । हामीले कैयौँ प्रयासहरू गर्नुपर्ने हुन्छ । त्यो बहुआयामिक व्यक्तित्व, त्यो राजनीतिक चेत, त्यो त्याग, त्यो बलिदान त्यो आदर्श सबै कुरा त हामी पढ्न मात्र सक्छौँ ।”

उनले बीपीबाट सिक्न मात्र सकिने बताए । “कम्तीमा मसँग उहाँसँग तुलना गर्ने साहस पनि छैन । तर, उहाँबाट सिक्नचाहिँ सक्छु,” लामिछानेले भने, “उहाँले विभिन्न कालखण्डमा गर्नुभएको निर्णयहरूबाट उच्च राजनीतिक चरित्र निर्वाह गर्नुभएको छ ।”

उनले आफूले बीपीको आत्मवृत्तान्त पुनः पढिरहेको सुनाए ।