काठमाडौं । आगामी मंसिर १० र २१ गते हुने प्रदेशसभा र प्रतिनिधिसभाको निर्वाचनको लागि वागी उमेदवारी परेपछि कम्युनिष्ट गठबन्धनका उमेदवारहरु संकटमा परेका छन् ।

उमेदवारी दर्तासँगै निर्वाचन प्रचार(प्रसारमा जुटिरहेको गठबन्धन वागी उमेदवारहरुलाई फकाउन पनि त्यतिकै सक्रिय भएर लागिरहेको काठमाडौं क्षेत्र नम्बर ६ बाट प्रतिनिधिसभा सदस्यका लागि उमेदवारी दिएका माओवादी केन्द्रका नेता झक्कु सुवेदीले जानकारी दिए । 

सुवेदीले बाह्रखरीसँग भने, "हाम्रो त त्यति धेरै वागी उमेदवारी छैनन् तर एमालेका धेरै छन् ।"

उनले गठबन्धनमा जोडिसकेपछि एमालेसँग भावनात्मक सम्बन्ध पनि विस्तार हुँदै गएको बताउँदै एमालेका वागी उमेदवारहरुलाई फकाउन आफूहरु पनि लागिपरेको बताए । उनले अगाडि थपे, "उहाँहरुविरुद्ध वागी दिएका उमेदवारहरुलाई हामी सम्झाएर उमेदवारी फिर्ता गराउन पठाइहाल्छौं । उहाँहरुलाई कसरी लैजाने भन्ने विषयमा हामी छलफलमा जुटिरहेका छौं ।"

काठमाडौं क्षेत्र नम्बर १ बाट प्रतिनिधिसभाको लागि उमेदवारी दिएका अनिल शर्माले पनि माओवादी र एमालेका सबै वागी उमेदवारी फिर्ता गराउन आफूहरु लागिपरेको बताए ।

कोमल वलीले फिर्ता लिइन्

यसैबीच प्रतिनिधिसभा निर्वाचनका लागि दाङ क्षेत्र नम्बर ३ बाट उमेदवारी दिएकी कोमल वलीले उमेदवारी फिर्ता लिएकी छिन् । हालैमात्र नेकपा एमालेमा प्रवेश गरेकी वलीले पार्टीबाट टिकट नपाएपछि स्वतन्त्र उमेदवारी दिएकी थिइन् । 

वागी उमेदवारी दर्ता गराएकी वलीले पार्टीका सबै नेतासँग छलफल गरेर उमेदवारी फिर्ता लिन लागेको बताइन् । उनले बाह्रखरीसँग भनिन्, "पार्टीले मलाई प्रतिनिधिसभा सदस्यका लागि क्षेत्र नम्बर ३ बाट टिकट दिने भनेको थियो, पछि विविध कारणले दिएन । त्यसकारण मैले वागी उमेदवारी दिएँ ।  अहिले फेरि सबै नेता तथा दाङबासीसँग छलफल भयो र मैले पार्टीको हितको लागि उमेदवारी फिर्ता लिने निर्णय गरें ।"