काठमाडौं । गएको मंसिरमा प्रहरीको केन्द्रीय अनुसन्धान ब्युरोले एटीएम कार्डको डाटासमेत ट्रान्सफर गर्न मिल्ने ‘मिनी म्याग्नेटिभ स्ट्रिप रिडर राइटर मेसिन’सहित टर्किस नागरिक मेहमत गुलेनलाई पक्राउ गर्यो । एपेक्स डेभलपमेन्टलगायत विभिन्न  बैंकबाट ‘शंकास्पद बैंकिङ ट्रान्जेक्सन’ भएको सूचना पाएपछि ब्युरोले अनुसन्धान थालेको थियो । त्यस क्रममा ब्युरोले नेपाल एटीएम ह्याकरको केन्द्र बनेको तथ्य नै पत्ता लगाएको थियो । गुलेनलाई ठमेलस्थित कर्मचारी सञ्चय कोषअगाडि एपेक्स बैंक र स्ट्याण्डर्ड चार्टर्ड बैंकको एटीएम बुथबाट पैसा झिक्दै गरेका बेला प्रहरीले पक्राउ गरेको थियो । उनले एटीएम ह्याक गरी विभिन्न व्यक्तिको खाताबाट पैसा झिकेका थिए । सीआईबीका अनुसार गुलेनले विदेशी नागरिककै एटीएमको डाटा र पिनकोड चोरी गरी मिनी म्याग्नेटिभ स्ट्रिप रिडर राइटर मेसिनमार्फत स्वीप कार्यमा एटीएमको डाटा ट्रान्सफर गरेर भिसा कार्ड, मास्टर कार्ड र डेबिट कार्ड बनाउने गरेका थिए । गुलेनले हिमालयन बैंक, स्ट्याण्डर्ड चार्टर्ड बैंकलगायतका एटीएम मेसिनबाट पैसा निकालेको प्रहरी अनुसन्धानले देखाएको छ । 

त्यसै गरी भिजिट भिसामा नेपाल आएका ह्याकर समूहका अर्का सदस्य रोमानियाका नागरिक अबलियन प्रेडालाई प्रहरीले गएको साउन १६ गते पक्राउ गर्यो । उनी पनि विदेशी नागरिकको पिन चोरी गरी नेपाल आएर एटीएमबाट पैसा झिकी पुनः फर्कने गर्दै आएका थिए । उनी सन् २०१५ यता तीन पटक नेपाल आएर रकम निकालेर गएको प्रहरी अनुसन्धानबाट खुलेको छ । पटक–पटक नेपाल आएर एटीएमबाट रकम निकालेर भाग्न सफल प्रेडालाई प्रहरीले साउन १६ मा काठमाठौंको लाजिम्पाटबाट १ सय ४० वटा एटीएम कार्डसहित पक्राउ गर्यो । सीआईबीका अनुसार उनी पनि अन्तर्राष्ट्रिय एटीएम ह्याकर समूहका मुख्य सदस्य हुन् । 

उनले बेलायत, फ्रान्स, जर्मनी, पेरु, रसिया, इटाली दक्षिण कोरिया, कोस्टारिका, जापान, इन्डोनेसियालगायत मुलुकका नागरिकको एटीएम ह्याक गरी रकम चोरी गर्दै आएको सीआईबीले जनाएको छ । 

त्यसैगरी ०७१ चैत १० पक्राउ परेका रिपब्लिक अफ बुल्गेरियाका पेट्रोस्लाभ रिस्टोभ पनि एटीएम ह्याकर समूहका अन्तर्राष्ट्रिय सदस्य हुन् । उनको पनि काम अरुको जस्तै ह्याक भएका एटीएम बोकेर नेपाल आएर रकम झिकेर फर्किने हो । 

प्रहरीका अनुसार यसरी एटीएम ठगी गर्ने धेरै विदेशी हुन्छन् । भिजिट भिसामा नेपाल आउने र केही दिन बस्ने अनि काठमाडौंमा भएका विभिन्न बैंकका एटीएम बुथबाट रकम निकालेर फर्किने उनीहरुको काम हो । यसरी ठगी गर्ने पर्यटकको आगमन नेपालमा धेरै हुने गरेको सीआईबीको अनुसन्धानले देखाएको छ । 

 

केन्द्रीय अनुसन्धान ब्युरोका प्रमुख डीआईजी नवराज सिलवालका अनुसार एटीएमको पिन कोड ह्याक गर्ने एक गिरोह विदेशमै हुन्छ । 

त्यो गिरोहले उतैको एटीमए बुथमा वेबक्याम राखेको हुन्छ । कतिपय एटीएमभित्रै पिनकोड रिड गर्न सक्ने क्षमताको अर्को डिभाइस राखेर एटीएमबारे जानकारी लिने गर्छन् उनीहरूले । 

त्यसरी पिन कोडको जानकारी संकलन भएपछि उनीहरू खातावाल व्यक्तिको विवरण भरेर भिसा कार्ड तथा अन्य बिजनेस कार्ड तयार पार्छन् । यसरी तयार पारेको कार्ड प्रयोग गरेर तस्करहरुले बैंकिङ सुरक्षा कम भएका र सहजै आवजावत गर्न मिल्ने देशमा गएर पैसा झिक्छन् । 

नेपाल पनि ह्याक भएको कार्डबाट पैसा झिक्न मिल्ने सहज देश हो । डीआईजी सिलवाल भन्छन्, “पर्यटक भिसामा नेपाल आउने कतिपय विदेशीको धन्दा एटीएमबाट पैसा निकालेर फर्किने हो ।” 

 

सीआईबी प्रमुख सिलवालका अनुसार ह्याक गरेको एटीएमबाट निकालेको रकम ६० प्रतिशत मुख्य ह्याकरले लिन्छ भने ४० प्रतिशत एटीएमबाट रकम निकाल्ने व्यक्तिले लिन्छ । पिन कोड ह्याक गर्ने र एटीएमबाट रकम निकाल्नेको प्रायः चिनजान पनि हुँदैन । पिन कोड ह्याक गरी नयाँ कार्डमा विवरण भरेर मुख्य ह्याकरबाट अर्कोको हातमा कार्ड पुग्छ, त्यसपछिमात्र एटीएममा पैसा झिक्नेको हातमा पर्छ । अनि उनीहरूले भिजिट भिसामा नेपाल आएर रकम निकाल्ने र अमेरिकी डलर वा युरोमा साटेर लाने गरेको प्रहरी अनुसन्धानबाट खुलेको छ । 

प्रहरीका अनुसार यसरी ह्याक भएका एटीएम कार्ड तीन प्रकारले प्रयोग हुने गरेका छन् । 

पहिलो, नेपाल तथा भारतका क्यासिनोमा स्वीप गरी रकम निकाल्ने ।

दोस्रो, नेपालीहरूलाई प्रयोग गरी महँगा क्यामेरा, मोबाइल, घडी तथा अन्य इलेक्ट्रोनिक्स सामान अनलाइनमार्फत सपिङ  गर्ने ।

तेस्रो, नेपाल घुम्न आउने बहानामा पर्यटक भिसामा नेपाल आउने र रकम निकाल्नेदेखि होटल तथा रेस्टुरेन्टमा कार्डमार्फत बिल तिर्ने र नेपाली एटीएमबाट रकम निकालेर फर्किने । 

नेपालको बैकिङ प्रणालीमा राम्रो सुरक्षा नभएकाले ह्याकरको रोजाइमा नेपाल परेको प्रहरी बताउँछ । सीआईबीले यसबारे नेपाल राष्ट्र बैंकलाई पटक–पटक जानकारी पनि गराइसकेको छ । 

 

उच्च स्रोतका अनुुसार प्रहरीका उच्च अधिकारी, सरकारका उच्च तहका कर्मचारी तथा राजनीतिक नेताहरूको सेटिङमा नेपालका क्यासिनोमा दैनिक करोडौंको कालोधनलाई ‘लिगलाइज’ गर्ने काम हुन्छ । त्यही मात्रामा चोरी गरेका पिन कोड र बिजनेस कार्डबाट रकम निकाल्ने काम पनि हुन्छ । “दिनहुँ नेपाली क्यासिनोमा करोडौंको अवैध धन्दा हुने गर्छ । ह्याक भएका एटीएमबाट करोडौंको कारोबार हुन्छ । तर, त्यो कुरा बाहिर आउँदैन,” प्रहरीका एक डीआईजीले बाह्रखरीसँग भने, “त्यसमा राष्ट्र बैंकका कर्मचारीदेखि लिएर कतिपय प्रहरी पनि मिलेका हुन्छन् ।” अहिले नेपालका धेरैजसो क्यासिनो बन्द भएकाले यस्तो धन्दा भारतका गोवा, सिक्किम तथा दार्जिलिङका क्यासिनोमा बढी हुन्छ ।