काठमाडौं । युलियन नगेल्सम्यानको प्रशिक्षणमा खेलेको पहिलो खेलमा जर्मनीले अन्तर्राष्ट्रिय मैत्रीपूर्ण फुटबलमा अमेरिकालाई ३–१ ले हराएको छ ।

अमेरिकाको रेन्चलर फिल्डमा भएको खेलमा क्रिस्टियन पुलिसिचले गोल गर्दै घरेलु टिमलाई अग्रता दिलाएका थिए । पुलिसिचले २७औँ मिनेटमा गोल गर्दै अमेरिकालाई अग्रतामा राखेका थिए ।

तर, ३९औँ मिनेटमा जर्मनीका इल्काइ गुन्डोगानले गोल गरेपछि खेलको पहिलो हाफ १–१ को बराबरीमा सकिएको थियो । जर्मनीले दोस्रो हाफमा दुई गोल थप्यो ।

५८औँ मिनेटमा निक्लास फुलक्रगले गोल गर्दै जर्मनीलाई २–१ को अग्रतामा राखेका थिए । त्यसको तीन मिनेटपछि नै यमल मुसियालाले गोल गर्दै जर्मनीको अग्रतालाई ३–१ को सहज अवस्थामा पुर्‍याएका थिए । यसपछि थप गोल भएन । नगेल्सम्यानको टिमले सहज जित निश्चित गर्‍यो ।

जर्मनीले गएको सेप्टेम्बरमा जापानसँग ४–१ को अप्रत्याशित हार व्यहोरेपछि तत्कालीन मुख्य प्रशिक्षक हेन्सी फ्लिकलाई बर्खास्त गरिएको थियो । ३६ वर्षीय नगेल्सम्यानलाई मुख्य प्रशिक्षकमा नियुक्त गरिएको थियो ।