काठमाडौं । धनुषाकी २२ वर्षीया आरती साहको मृत्यु प्रकरणमा प्रहरीको तर्फबाट सुरुवाती चरणको अनुसन्धानमै कमजोरी रहेको भन्दै पीडित परिवार ११८ दिनदेखि धर्नामा छ । आरती साहको ६ जेठमा मृत्यु भएको थियो ।
करिब दुई वर्षअघि धनुषाकै मोतीबाबु साहसँग बिहे गरेकी आरतीलाई उनकै श्रीमान्ले यातना दिएर हत्या गरेको उनकी आमा निर्मला देवी साहको आरोप छ ।
निर्मलादेवी सुरुवाती चरणमा अनुसन्धान गर्ने प्रहरी अधिकारीको कारबाहीको माग गर्दै माइतीघर मण्डलामा धर्नामा बसेकी छन् ।
प्रहरीले आरतीको मृत्य प्रकरणका लागि सुरुमै कमजोरी गरेको तथा अनुसन्धानका लागि जिल्ला प्रहरी कार्यालय धनुषा पुग्दा उल्टै धुनषाका प्रहरी प्रमुख एसपी विश्व खड्काले आफूहरूमाथि कुटपिट गरेको आरोप निर्मलादेबीको छ ।
एसपी खड्काको कुटपिटबाट आफ्नो कानको जालीसमेत फुटेको र आफ्नो छोरामाथिसमेत कुटपिट गरेकाले कारबाहीको माग गर्दै धर्नामा बस्नुपरेको निर्मलाले बाह्रखरीलाई बताइन् ।
निर्मलादेवी एसपी खड्कासहित डीएसपी वेदप्रसाद गौतम, सई जयप्रकाश साह र प्रहरी जवान हनुमान राईको फोटो नै पोस्टरमा राखेर धर्नामा छिन् ।
जिल्ला प्रहरी कार्यालय धनुषाका डीसएसपी रन्जन अवाले भने पीडितले दिएको उजुरीको अरोपमा मोतीबाबु र उनका बुबालाई पक्राउ गरिएको दाबी गरे ।
"पीडित परिवारको उजुरीकै आधारमा हामीले मोतीबाबु र उनका बुबालाई पक्राउ गरेका थियौँ । उनीहरूलाई जिल्ला अदालतले समेत पुर्पक्षका लागि जेल पठायो । यो त हाम्रो अनुसन्धानको सफलता हो," डीएसपी अवाले भने ।
हाल मोतिबाबु र उनका बुबालाई उच्च अदालत जनकपुरले थुनामुक्त गरेको छ ।
आरती दुई महिनाको गर्भवती हुँदा मोतीबाबुको कुटपिटबाट उनको हत्या भएको निर्मलादेवीको आरोप छ ।
जहाँगयो त्यहीँ विवादित हुन्छन् एसपी खड्का
एसपी खड्का जहाँ प्रहरी प्रमुख भएर गयो त्यहाँ विवादित बन्दै आएका छन् । एसपीमा बढुवा भएलगत्तै उनी धनुषा प्रहरी प्रमुख भएर गएका थिए ।
खड्का पूर्वगृहमन्त्री एवं दिवंगत नेपाली कांग्रेसका नेता खुमबहादुर खड्काका भतिजा हुन् ।
यसअघि डीएसपी हुँदा महानगरीय प्रहरी वृत्त बालाजु र इलाका प्रहरी कार्यालय गजुरीमा रहँदा प्रहरी आचरण विपरीत काम गरको भन्दै खड्कालाई प्रहरी प्रधान कार्यालयले सरुवा अवधि नपुग्दै तानेको थियो ।
यस्तै, ललितपुर परिसरमा कार्यरत रहँदा एक लाख रुपैयाँ घुस काण्डमा मुछिएपछि उनी कारबाहीमा परेका थिए ।
म्याग्दी जिल्ला प्रहरी प्रमुख र इलाका प्रहरी कार्यालय राजापुरको प्रमुख हुँदा पनि उनी विवादरहित हुन सकेनन् ।
खड्का अर्को सुरक्षा निकाय राष्ट्रिय अनुसन्धान विभागबाट २५ पुस २०५८ मा जनपद प्रहरीमा आएका अधिकृत हुन् ।
-1716278128.jpg)
-1734691541.jpg)
