काठमाडौं । सशस्त्र प्रहरी बल नेपालले तराईका जिल्लाहरुमा हुने अवैध क्रियाकलाप नियन्त्रणमा थप सक्रियता देखाएको छ ।

२०७९ चैत्र देखि २०८० भाद्र १५ गतेसम्मको अवधिका सशस्त्र प्रहरी बल नेपाल नं. २ छिन्नमस्ता बाहिनी मुख्यालय महोत्तरी तथा मातहतका इकाईहरुले २४ करोडभन्दा बढीको अवैध सामान नियन्त्रणमा लिएको छ ।

सो अवधिमा २० करोड ७७ लाख ६ हजार १४४ रुपैयाँ बराबरको चोरीपैठारीको किराना सामान, लत्ताकपडा, मोटर पार्ट्स, सवारीसाधनलगायतका सामान नियन्त्रणमा लिएर सम्बन्धित नियकायमा बुझाइसकेको छ ।

त्यस्तै, एक करोड एक लाख ४४ हजार ३९३ रुपैयाँ बराबरको पशुचौपाया, स्रोत नखुलेको नेपाली रुपैयाँ ९९ लाख चार हजार ३१५, भारतीय रुपैयाँ २८ लाख १७ हजार ३१५ समेत बरामद भएको छ ।  सोही अवधिमा ७९ लाख ४२ हजार ६५० रुपैयाँ बराबरको करिब दुई हजार ८१३ क्युफिट काठ र आठ लाख ४८ हजार ५५३ रुपैयाँ बराबरको सुन तथा चाँदी बरामद गरेको छ ।

सोही अवधिमा करिब एक हजार तीन केजी गाँजा, ३७.७१ केजी चरेश, पाँच हजार ७०७ वटा विभिन्न किसिमका लागुऔषध (नर्फिन, फेनार्गन, डाइजेपाम, कोरेक्स, सिरिन्ज, नाइट्रोभेट) ट्याब्लेट बरामद भएको छ ।

त्यस्तै, चार नाल हतियार, २० वटा गोली, दुईवटा म्याग्जिन र १२ वटा कार्टिज बरामद भएको छ । भारतमा बेचबिखन गर्न लगिएका २० जना नेपाली चेलीबेटीहरुको उद्धार गरिएको छ भने सो कार्यमा संलग्न रहेका ११० जनालाई पक्राउ गरिएको छ ।

चोरीपैठारीलगायतका कार्यमा प्रयोग भएका ६४६ वटा विभिन्न कम्पनीका सवारीसाधन समेत बरामद गरी भन्सार दाखिला गरेको छ ।