काठमाडौं । एएफसी एसियन कपको छनोट खेल्न मंगोलिया जाने नेपाली राष्ट्रिय फुटसल टिमलाई अखिल नेपाल फुटबल संघ (एन्फा)ले बिदाइ गरेको छ । बुधबार सातदोबाटोस्थित एन्फा मुख्यालयमा एन्फा पदाधिकारीहरूले नेपाली टोलीलाई बिदाइ गरेका हुन् ।

असोज २० देखि २३ गतेसम्म मंगोलियामा एसियन कप फुटसल छनोटका खेल हुँदै छन् । बिदाइ कार्यक्रममा मुख्य प्रशिक्षक गौरव बस्नेतले एसियन कप छनोट समूहमा बलियो टिम भए पनि बलियो प्रतिस्पर्धीको रूपमा चुनौती प्रस्तुत गर्ने बताए । उनले नेपालमा फुटसलको लिग र पर्याप्त खेल नभएका कारण अनुभव बटुल्ने मौका पाउन नसकेको बताए ।

त्यस्तै, नेपाली टोलीका कप्तान मणिकुमार लामाले पहिलो चरण खेल्ने टिमलाई बलियो चुनौती दिने बताए । तयारी गर्ने समय कम भए पनि राम्रो नजिता आउने उनले बताए ।

छनोट प्रतियोगितामा विभिन्न ३१ राष्ट्र सहभागी छन् । यसलाई विभिन्न आठ समूहमा विभाजन गरिएको छ । नेपाल भने समूह ‘डी’ मा रहेको छ । नेपालको समूहमा भियतनाम, दक्षिण कोरिया र मङ्गोलिया छन् । प्रत्येक समूहका शीर्ष स्थान हासिल गर्ने टोली एएफसी फुटसल एसियन कपका लागि छनोट हुने छन् ।

त्यसैगरी प्रतियोगितामा उत्कृष्ट सात उपविजेता टोलीले पनि प्रतियोगितामा सहभागिता जनाउन पाउने छन् ।