काठमाडौं । स्लोभाकियाका पूर्वप्रधानमन्त्री एवं रूसका खुला समर्थक रोबर्ट फिकोको पार्टी संसदीय चुनावमा विजयी भएको छ ।

आइतबार बिहान स्लोभाकियाको तथ्यांक कार्यालयले सार्वजनिक गरेको प्रारम्भिक नतिजामा ९९ प्रतिशत भन्दा बढी जिल्लाको मतगणना हुँदा रोबर्ट फिकोको पार्टीले २३.३ प्रतिशत मत प्राप्त गरेको छ ।

एसएभईआर भनेर चिनिने रोबर्ट फिकोको पार्टी सोसल डेमोक्रेसीलाई सरकार चलाउन भने गठनबन्धन आवश्यक पर्नेछ ।

यस्तै, लिबरल प्रोग्रेसिभ स्लोभाकिया (पीएस) पार्टी १७ प्रतिशत भोटसहित दोस्रो स्थानमा रहेको छ ।

एसएमईआरबाट विघटन भएर बनेको हलास (एचएलएएस) पार्टी १५ प्रतिशत मतका साथ तेस्रो भएको छ ।

संसद्मा प्रवेश पाउन आवश्यक कम्तीमा पाँच प्रतिशत मत प्राप्त गर्ने सात राजनीतिक दलबीच अब, सरकार गठनका लागि गठबन्धन बनाउन विशेष वार्ता र प्ले हुने ठानिएको छ ।