काठमाडौं । धितोपत्र दोस्रो बजार मापक नेप्से परिसूचक बुधबार १८.६० अंकले घटेको छ । गत कारोबार दिन मंगलबार १८.४५ अंकले वृद्धि भएर बन्द भएको बजार बुधबार त्यही अंकमा घटेको हो ।

यस दिन नेप्से ०.९१ प्रतिशतले घटेर २००४.३० विन्दुमा बन्द भएको छ । गत सोमबार पनि बजार २००४ विन्दुमा नै बन्द भएको थियो ।

आज नेप्सेसँगै कारोबार रकम पनि घटेको छ । मंगलबार दुई अर्ब नौ करोड रुपैयाँको सेयर कारोबार भएकोमा बुधबार (आज) भने एक अर्ब ८१ करोड रुपैयाँको सेयर कारोबार भएको छ ।

कारोबारमा आएका १३ वटै समूहको परिसूचक घटेको छ । सर्वाधिक परिसूचक घट्नेमा हाइड्रोपावर समूह रहेको छ । यो समूहको परिसूचक १.५१ प्रतिशतले घटेको छ । मंगलबार भने यो समूहको परिसूचक सर्वाधिक वृद्धि भएको थियो ।

आज मनकामना इन्जिनियरिङ हाइड्रोपावरको सेयर मूल्य ९.९० प्रतिशतले वृद्धि भएर प्रतिकित्ता २७२ रुपैयाँ कामय भएको छ । शुभम् पावरको सेयर मूल्य भने ९.९९ प्रतिशतले घटेर प्रतिकित्ता ८४२ रुपैयाँ कायम भएको छ ।

सर्वाधिक सेयर कारोबार हुनेमा सन नेपाल लाइफ इन्स्योरेन्स कम्पनी लिमिटेड रहेको छ । यो कम्पनीको सात करोड ६२ लाख रुपैयाँको सेयर खरिद–बिक्री भएको छ ।

आज कारोबारमा आएका २८२ धितोपत्रको ७० लाख ६१ हजार ४०४ कित्ता खरिद–बिक्री भएको नेपाल स्टक एक्सचेन्ज (नेप्से)ले जनाएको छ ।

पछिल्लो समय सेयर बजारमा लगाइएको १२ करोड रुपैयाँको क्यापलाई लिएर प्रचार प्रसारका कारणले पनि बजार प्रभावित हुन पुगेको कतिपयको आकलन छ ।