काठमाडौं । ओपनएआईको आर्टिफिसियल इन्टेलिजेन्स (एआई)मा आधारित च्याटबट च्याटजीपीटीले अब भ्वाइस प्रतिक्रिया समेत दिने भएको छ । सोमबार एक ब्लग पोस्टमार्फत च्याटजीपीटीमा अब, हेर्न, सुन्न र बोल्न सक्ने फिचर थप गरिएको ओपनएआईले जनाएको छ ।
च्याटजीपीटीमा समेटिएको भ्वाइस अन्तरक्रिया फिचरले अब पहिले लेखेर मात्र पाउन सकिने जवाफ बोलेर सोधेरै सुन्न सकिनेछ । यसबाहेक च्याटजीपीटीले सुत्ने बेला कथा सुनाउनेदेखि बहसका विषय समाधान गर्न समेत मद्दत गर्ने कम्पनीको भनाइ छ ।
यस्तै, च्याटजीपीटीमा अब कुनै फोटो राख्दा त्यसबारे जानकारी दिन सक्ने कम्पनीले जनाएको छ । केको फोटो हो भनेर पहिचान गर्नेदेखि च्याटजीपीटीले फोटो देखाएर समस्या समाधान गर्ने सुझाव समेत दिन सक्ने ओपनएआईले जनाएको छ ।
यी फिचर च्याटजीपीटी प्लस र इन्टरप्राइज सर्भिस लिएका सःशुल्क प्रयोगकर्ताले मात्र आउँदो दुई सातापछि प्रयोग गर्न पाउनेछन् ।
