विराटनगर । नेपाल (एमाले) कोसी प्रदेशको नेतृत्वमा पुग्न नेताहरूबीच रस्साकस्सी सुरु भएको छ । अध्यक्ष पदमा चारजनाले दाबी प्रस्तुत गरेका छन् ।
अधिवेशनका लागि प्रतिनिधिको छनोट सकिएको प्रदेश कमिटीका सचिव चिन्तन पाठकले जानकारी दिएका छन् ।
“धेरै जिल्लामा सर्वसम्मत रूपमा प्रतिनिधि छानिनु भयो,” पाठकले भने, “शुक्रबार साँझसम्म प्रतिनिधि छनोट गरिसक्ने तयारी थियो । सुनसरी र उदयपुरमा भने एक दिन ढिलो गरी सकियो ।”
अधिवेशनमा ताप्लेजुङबाट ४८, पाँचथर ३०, इलाम ७७, झापा १८१, संखुवासभा ३९, तेह्रथुम ४३, भोजपुर २७, धनुकटा ७२ जना प्रतिनिधि चयन भएका छन् ।
त्यस्तै, सुनसरी ९६, मोरङ १७८, सोलुखुम्बु १६, ओखलढुंगा ४२, खोटाङ ५६, उदयपुर ३६ र विभिन्न २३ वटा जनसंगठनबाट ५६ जना प्रतिनिधि चयन भएका छन् ।
९९७ सहभागी हुनेमध्येको पाँच प्रतिशत अर्थात ५० जना मनोनीत गरी कुल एक हजार ४७ प्रतिनिधिले भाग लिने सचिव पाठकले बताए ।
उनले भने, “अधिवेशनमा ३३४ महिला र ७१३ पुरुष प्रतिनिधिमध्ये दलितबाट ५३ र मजदुरबाट ३२ जना सहभागी हुनु हुनेछ ।” एमालेको प्रदेश कमिटी २१५ जनाको हुनेछ ।
एमालेको कोसी प्रदेश अधिवेशन असोज १२ र १३ गतेलाई तय भएको छ । तयारीका लागि १४ उपसमिति गठन भएका छन् । विराटनगरमा पार्टी अध्यक्ष केपी शर्मा ओलीले उद्घाटन गर्ने अधिवेशनमा पार्टीमा प्रदेशबाट प्रतिनिधित्व गर्ने केन्द्रीय सदस्य, सल्लाहकार र केन्द्रीय निकायका सदस्य अतिथिको रुपमा आमन्त्रण गरिएको एमालेले जनाएको छ ।
अध्यक्षका आकांक्षी को कस्ता ?
एमाले कोसी अध्यक्ष बन्ने दौडमा चारजना आकांक्षी देखिएका छन् । विनोद ढकाल, घनश्याम खतिवडा, तुलसीप्रसाद न्यौपाने र टीका चेम्जोङ रहेका छन् ।
ढकाल मोरङ जिल्लाका पूर्वअध्यक्ष हुन् । यसैगरी खतिवडा प्रतिनिधि सभाका पूर्वसांसद हुन् ।
न्यौपाने हाल पार्टी प्रदेश कमिटी अध्यक्ष छन् । उनी छोटो समयको लागि कोसी प्रदेशको पूर्वआर्थिक मामिला तथा योजनामन्त्रीको जिम्मेवारीमा पनि थिए । तर, सरकार ढलेसँगै उनी मन्त्री पदबाट बाहिरिएका थिए । चेम्जोङ पार्टीको प्रदेश कमिटी उपाध्यक्ष हुन ।
अध्यक्षका चारैजना प्रत्यासी आ–आफ्नो जिल्लाबाट प्रतिनिधि छनोट भइसकेका छन् । पार्टी विधानअनुसार निर्वाचित प्रदेश अध्यक्षको हैसियत पार्टीको पोलिटब्युरो सदस्य सरह हुन्छ ।
अध्यक्षका आकांक्षी ढकालले पार्टीको आन्तरिक प्रतिस्पर्धा भएकोले सकेसम्म सर्वसम्मतिको प्रयास हुने बताउँदै आफूले पार्टीमा लामो समयसम्म जिल्ला तहमा बसेर काम गरेकोले पनि प्रदेशमा दाबी गरेको बताए ।
“अधिवेशन नै भएकोले साथीभाइ र प्रतिनिधिहरूलाई आफ्नो एजेण्डा बताउने काम गरिरहेको छु,” ढकालले भने ।
ढकाल मोरङमा दुई कार्यकाल अध्यक्ष थिए । संगठन सुदृढीकरणदेखि प्रदेश राजधानी विराटनगरमा अन्तर पार्टी समन्वयमा समेत उनको नेतृत्वको चर्चा हुनेगर्छ । पार्टी विभाजनका बेलासमेत मोरङमा पार्टी तथा भ्रातृसंगठनमा क्षति हुन नदिएको पार्टी पंक्तिभित्रै उनको सवल पक्ष मान्ने गरिएको छ । विगतदेखि नै पार्टी अध्यक्ष केपी ओली निकट रहेर काम गरेका ढकाल यसअघि प्रतिनिधिसभा सदस्य निर्वाचनमा समेत उमेदवार थिए ।
मोरङको उर्लाबारीका घनश्याम खतिवडा यसअघि प्रतिनिधिसभा सदस्य थिए । पछिल्लो संसदीय निर्वाचनमा भने उनी कांग्रेसका डिगबहादुर लिम्बूसँग पराजित बने ।
नेकपा (एकीकृत समाजवादी) बन्नु अघिसम्म खतिवडा पनि माधव नेपाल समूहमा थिए । १० बुँदे सहमतिपछि समाजवादीतिर लागेनन् एमालेमै रहे । खतिवडा मोरङमा भएका एमालेका पाका नेताको सूचीमा पर्छन् ।
“मैले पार्टीभित्र एकताको लागि प्रयास गरौं भनेको छु । यो भएन भने पार्टीभित्र कहिलेकाहीँ अध्यक्षको उमेदवार बन्नु नराम्रो होइन । पार्टीमा काम पाउँ भनेर आग्रह गरेको हो,” खतिवडाले भने, “पहिले सांसद थिए । लामो समयसम्म संसदीय फाँटमा काम गरें । पार्टीको मूल जिम्मेवारी लिने इच्छा गरेको हो । अनुमोदन हुनेमा विश्वास छ तर सहमतिमा बाधक चाहिँ होइन ।”
प्रदेश कमिटीका वर्तमान अध्यक्ष तुलसीप्रसाद न्यौपाने संखुवासभाका हुन् । एमाले विभाजनअघि उनी माधव नेपाल समूहमा थिए । तर, विभाजनपछि पनि पार्टीमै रहे ।
प्रदेशसभा सदस्य हुँदै आर्थिक मामिला तथा योजनामन्त्री बने । तर, लामो समय काम गर्न पाएनन् । आफ्नो कार्यकालमा बजेट ल्याउन नपाइ न्यौपानेको कार्यकाल सकिएको थियो ।
अर्का आकांक्षी टिकाराम चेम्जोङ प्रतिनिधिसभाका पूर्वसांसद हुन् । अहिले प्रदेश कमिटी उपाध्यक्ष छन् । उनले तत्कालीन जिल्ला विकास समितिमा समेत नेतृत्व निर्वाह गरेका थिए ।
