काठमाडौं । काठमाडौं महानगरपालिकाभित्रका शिक्षकहरूले शिक्षा विधेयकविरुद्धको आन्दोलनमा सहभागी हुने निर्णय गरेका छन् । आन्दोलनमा गएर पठनपाठनमा अवरोध पुर्‍याए कारबाही गर्ने महानगरको चेतावनीका बाबजुद उनीहरूले सडक आन्दोलनमा जाने निर्णय गरेका हुन् । 

आज बसेको महानगरभित्रका शिक्षकहरूको बैठकले आजदेखि सुरु भएको आन्दोलनलाई समर्थन गर्दै सहभागी हुने निर्णय गरेको हो ।

महानगरले आजै एक सूचना जारी गर्दै पठनपाठन बन्द गरी आन्दोलनमा जाने शिक्षकलाई कारबाही गरिने चेतावनी दिएको छ ।

"सामूहिक सौदाबाजीका माग राख्ने र पुरा गर्ने आफ्नै विधि, प्रक्रिया र पद्धति हुन्छन् ।  कोरोनाले प्रभावित भएको शिक्षा क्षेत्र सुधारोन्मुख रहेका बखत विद्यालय बन्द गरेर पुनः शैक्षिक क्षति गर्नु शिक्षकको नैतिकता र आचरणले दिँदैन," महानगरको सूचनामा भनिएको छ ।

तर, शिक्षकहरूले महानगरको अवज्ञा गर्दै आन्दोलनमा जाने निर्णय गरेका हुन् ।