![बिन्दु सुवेदीको ‘युरोप यात्राका संस्मरण’ सार्वजनिक](https://12khari.top/uploads/posts/Bindu-Subedi-book-1695211225.jpg)
काठमाडौं । साहित्यकार बिन्दु सुवेदीको दोस्रो नियात्राकृति ‘युरोप यात्राका संस्मरण’ लोकार्पण गरिएको छ ।
बुधबार काठमाडौंमा आयोजित कार्यक्रममा प्रमुख अतिथि प्रा.डा. अञ्जना वस्ती भट्टराईले नियात्राकृति सार्वजनिक गरिन् ।
कार्यक्रमलाई सम्बोधन गर्दै डा. भट्टराईले सर्जक सुवेदीको तीक्ष्ण अवलोकन क्षमता कृतिका नियात्रा पढ्दा थाहा हुने बताइन् । कृतिका शब्दहरूले स्थान विशेषको प्रष्ट तस्बिर गर्दै दृश्यलाई जीवन्त बनाएको उल्लेख गरिन् ।
नियात्राकार श्रीओम श्रेष्ठ रोदनले सार्वजनिक कृतिमा युरोपका सात देशहरूको भ्रमणबारे लेखिएको उल्लेख गर्दै सर्जक सुवेदीले पाठकलाई शब्दहरूसँगै घुमाएको बताए । सार्वजनिक कृति सरल र पाठकमैत्री भएको उनले बताए ।
सर्जक सुवेदीले सन् २०१८ मा गरेको युरोप भ्रमण पाँच वर्षपछि कृतिका रूपमा आउँदासम्मका प्रसंग रोचक तरिकाले प्रस्तुत गरिन् ।
सलील र गिरिश सुवेदीको सांगीतिक प्रस्तुतिसमेत रहेको कार्यक्रममा साहित्यकार जलेश्वरी श्रेष्ठले पनि बोलेकी थिइन् ।