काठमाडौं । रियाल सोसिडाडविरुद्ध २–१ को पुनरागमन जित निकाल्दै रियाल मड्रिड स्पेनिस ला लिगाको शीर्ष स्थानमा उक्लिएको छ ।

आइतबार राति घरेलु मैदानमै १–० ले पछि परेको स्थिति उल्ट्याउँदै रियाल जित निकालेको हो ।

रियाललाई जित दिलाउन फेडेरिको भाल्भर्डे र जासेलुले गोल गरेका थिए । त्यसअघि खेलको पाँचौ मिनेटमा एन्डरले गोल गर्दै सोसिडाडलाई अग्रता दिलाएका थिए । त्यही गोलमा सोसिडाडले पहिलो हाफमा १–० को अग्रता बनाएको थियो ।

४६औं मिनेटमा भाल्भर्डेले गोल गरेपछि रियाल मड्रिड खेलमा फर्किएको थियो । यस्तै, ६०औं मिनेटमा जोसेलुले गरेको गोल निर्णायक बनेपछि रियाल मड्रिडले तीन अंक निश्चित गर्यो । जारी सिजन रियाल मड्रिडले लिगमा शतप्रतिशत जित निकालेको छ ।

जितसँगै पाँच खेलबाट १५ अंक जोडेको रियाल मड्रिड तालिकाको शीर्ष स्थानमा उक्लिएको छ । जुन दोस्रो स्थानको बार्सिलोनाभन्दा दुई अंक धेरै हो । समान खेलबाट ६ अंक जोडेको सोसिडाड ११औं स्थानमा छ ।