काठमाडौं । साल्ट ट्रेडिङ कर्पोरेसन लिमिटेडले कारोबार र सेवा क्षेत्र विस्तार गर्न प्रयत्नशील रहेको जनाएको छ । 

बुधबार कर्पोरेसनले काठमाडौंमा स्थापनाको ६१औँ वार्षिकोत्सव मनाउँदै यस्तो बताएको हो । कर्पोरेसन जनतालाई दैनिक उपभोग्य वस्तुहरू उपलब्ध गराउने लक्ष्य लिएर स्थापना भएको ६० वर्ष पूरा गरेको छ । 

कर्पोरेसनले उद्देश्यअनुसार जनतालाई सुपथ र सहजरूपमा गुणस्तरीय उपभोग्य वस्तुहरू उपलब्धतालाई निरन्तरता दिइरहेको कर्पोरेसनकी प्रमुख कार्यकारी अधिकृत उर्मिला श्रेष्ठले बताइन् ।  

उनले कर्पोरेसन अफ्ठ्यारो परिस्थितिमा पनि आम उपभोक्ताहरूलाई सहजरूपमा व्यापार विविधिकरणसहित सक्रिय बनाउने प्रतिवद्धता जनाइन् । 

कर्पोरेसनले कृषि क्षेत्रको विकासमा समेत योगदान पुर्‍याउने उद्देश्यले अनुदानित मलमा मात्रै सीमित नभइ गैर अनुदानित मल पनि आयात गरी बिक्री वितरण गरिरहेको बताइन् ।