विराटनगर । कोसी प्रदेशका मुख्यमन्त्री हिक्मत कार्कीले प्रदेशलाई बजेटविहीनताको अवस्थाबाट निकास दिने बताएका छन् । शुक्रबार साँझ मुख्यमन्त्रीको शपथ लिएपछि पत्रकारहरूसँग कुराकानी गर्दै कार्कीले आइतबारसम्म अध्यादेशमार्फत बजेटविहीनताको अवस्था अन्त्य गर्ने बताएका हुन् ।

भदौ १० गते भित्र कार्की नेतृत्वकै सरकारले ल्याएको बजेट अध्यादेश प्रतिस्थापन विधेयक सदनबाट पारित नहुँदा ‘फेल’ भएको थियो । अहिले कोसी प्रदेश बजेटविहीन अवस्थामा छ । 

अर्को प्रसंगमा कार्कीले अदालतले यसअघि भएका असंवैधानिक क्रियाकलापलाई सच्याइदिएको र त्यसलाई आफूहरूले स्वागत गरेको पनि बताए । कार्कीले अहिले कोसी प्रदेश निकै अप्ठेरो परिस्थितिमा रहेको भन्दै सबै दल मिलेर निकास खोज्नुको विकल्प नभएको बताए ।

“कोसी प्रदेशको राजनीतिक परिस्थिति अलि जटिल अवस्थामा पुगेकोले सबै दल मिलेर यसको निकास खोज्नुको विकल्प छैन,” कार्कीले भने, “मैले पहिले पनि सर्वदलीय सरकारका लागि आह्वान गरेको थिएँ । अहिले पनि त्यो आवश्यक छ भन्ने नै मेरो धारणा हो ।”

प्रदेश प्रमुख पर्शुराम खापुङले आज साँझ कार्कीलाई मुख्यमन्त्रीमा नियुक्त गरी पद तथा गोपनीयताको शपथ गराएका हुन् ।