काठमाडौं । नेपाल धितोपत्र बोर्डले धितोपत्र दर्ता तथा निष्कासन नियमावली, २०७३ लाई सातौँ संशोधन गरेको छ । बोर्डले उक्त नियमावली संशोधन गरी धितोपत्र दर्ता तथा निष्कासन (सातौँ संशोधन) नियमावली, २०८० लागु गरेको हो ।

यो नियमावलीले संशोधन गरेर बोर्डले एनआरएन नेपाल डेभलपमेन्ट फन्डलाई आईपीओ निष्कासन गर्न बाटो खुला गरिदिएको छ । मूल नियमावलीमा नियम ४१ (ख) थप गरी संयुक्त लगानीमा स्थापना भएको इन्भेस्टमेन्ट कम्पनीले जारी गर्ने धितोपत्र भन्ने वाक्यांश थप गरेको छ । यो व्यवस्थाले गैरआवासीय नेपाली (एनआरएन)हरूले अब नेपालमा कम्पनी खोल्न पाउने भएका छन् ।

यसअघि नेपाल सरकार र गैरआवासीय नेपालीहरूको लागनीमा नेपालमा पूर्वाधार, उत्पादनशीललगायतका क्षेत्रमा लगानी गर्ने गरी १० अर्ब रुपैयाँको पुँजी भएको ‘एनआरएन नेपाल डेभलपमेन्ट फन्ड’ कम्पनी स्थापना भइसकेको छ । यो कम्पनीलाई धितोपत्रको व्यवस्थाले आईपीओ निष्कासन गर्न सहज बनाएको छ । तर, यो फन्डले निष्कासन गरेको आईपीओमा गैरआवासीय नेपालीले मात्र आवेदन दिन पाउने छन् । धितोपत्र बोर्डका अध्यक्ष रमेशकुमार हमालका अनुसार एनआएनहरूलाई धितोपत्र दोस्रो बजारमा भित्र्याउन यो व्यवस्था गरिएको हो ।

नेपालको धितोपत्र दोस्रो बजारमा यो कम्पनीको सेयर कारोबार हुने भए पनि एनआरएनहरूले मात्र खरिदबिक्री गर्न पाउने उनको भनाइ छ ।

“कुनै एनआरएनले खरिद गरेको आईपीओ दोस्रो बजारमा बिक्री गर्नपर्‍यो भने एनआरएनहरूमा नै बिक्री गर्नुपर्ने हुन्छ । दोस्रो बजारमा सूचीकृत भएपछि एनआरएनहरूबीचमा यो कम्पननीको कारोबार हुन्छ । सेयर खरिदबिक्री गरेबापत नेपाल सरकारलाई कर तिर्नुपर्छ,” उनले भने, “यो व्यवस्थाले विदेशमा भएका नेपालीबाट देशमा लगानी भित्रिन्छ । यसका लागि कार्यविधि बनाउँन बाँकी छ । राष्ट्र बैंकसँग छलफल गरेर हामी कार्यविधि बनाउँछौँ ।”

एनआरएन नेपाल डेभलपमेन्ट फन्डमा गैरआवासीय नेपालीको नौ अर्ब ५० करोड रुपैयाँ र नेपाल सरकारको ५० करोड रुपैयाँ सेयर लगानी हुने छ । यो फन्ड २०७७ चैत ३० गते एनआरएन नेपाल डेभलपमेन्ट फन्ड लिमिटेडको नाममा कम्पनी रजिस्ट्रार कार्यालयमा दर्ता भएको छ ।

नियमावलीमा यो फन्डलाई आईपीओ निष्कासन गर्न सहज बनाइदिएसँग फन्डको तर्फबाट आवश्यक प्रक्रिया थालिएको एनआरएन नेपाल इन्भेस्टमेन्ट फन्डका प्रमुख कार्यकारी अधिकृत (सीईओ) अनलराज भट्टराई बताउँछन् ।

“अब हाम्रो आन्तरिक प्रक्रिया अगाडि बढाउँछौँ । आईपीओ निष्कासन भएपछि दोस्रो बजारमा कारोबार गर्नपर्‍यो भने एनआरएन नै खोज्नुपर्छ,” उनले भने, “पहिलोपटक यो कम्पनीको आईपीओ एनआरएनहरूलाई खुल्ने छ । यसको प्राइज फेस भ्यालूमा नै हुने छ । यो कम्पनीको आईपीओमा ८५ वटा देशमा भएका गैरआवासीय नेपालीहरूले आवेदन दिन सक्छन् ।”

कार्यविधि बनेपछि गैरआवासीय नेपालीहरूलाई यो फन्डको आईपीओ खुला हुने छ ।