काठमाडौं । अर्थमन्त्री डा. प्रकाशशरण महतले नेपाल राष्ट्र बैंकको नीतिले सेयर बजारलाई असर गरेको बताएका छन् ।

प्रतिनिधिसभाको बिहीबारको बैठकमा मन्त्री महतले राष्ट्र बैंकका केही नीतिले गर्दा बजारमा असर परेको बताएका हुन् । ती नीतिको विषयमा राष्ट्र बैंकसँग छलफल भइरहेको उनले बताए ।

“अहिले सेयर मूल्यमा गिरावट आएको छ । त्यसमा विविध कारणहरू छन् । राष्ट्र बैंकको नियमनका कारण पनि हुन्छ । त्यसबाट परेको प्रभावका विषयमा हामीले आवश्यक संवाद गरिरहेका छौँ,” उनले भने, “हामी चाहन्छौँ कि यो सेयर बजारले एउटा सहज रूप लियोस् । लगानीकर्ताको लगानी नडुबोस् ।”

जुनसुकै व्यवसायमा लागेकाले पनि सेयर कारोबार गर्न पाइने भन्दै यसलाई सहज रूपमा लिनुपर्ने उनको भनाइ छ । तर, इन्साइडर ट्रेडिङ गर्न भने कसैलाई छुट नभएको उनले बताए ।