काठमाडौं । दिवङ्गत अभिनेता सारुक ताम्राकारकी आमा रुकमणि ताम्राकारले आफ्नो छोराको आत्महत्या घटनाको राम्रोसँग छानबिन गर्न प्रहरीलाई आग्रह गरेकी छन् ।

उनले घटनाको छानबिनबारे अहिलेसम्म आफूलाई कुनै पनि जानकारी नदिएको पनि बताएकी छन् । रुकमणिले सारुकको अन्तिम सुटिङका क्रममा के भएको थियो भन्नेबारे पत्ता लगाउन आग्रह गरेकी छन् । साथै उनले फोन विवरण पनि बाहिर ल्याउन भनेकी छन् । 

सोमबार फेसबुकमा उनले लेखेकी छन्, "मेरो छोरा गुमाउनुको साथै ५२ दिनमा  मेरो श्रीमान् पनि गुमाउँदा  ममाथि ठूलो बज्रपात परेको छ | यतिका दिनसम्म पनि पुलिस प्रशासनबाट छानबिन कहाँसम्म पुग्यो भन्ने कुराको खबर नआउँदा म सम्पूर्ण पुलिस प्रशासनलाई अनुरोध गर्दछु कि छोराको अन्तिम सुटिङको बेला के भएको थियो र मेरो छोराले यो कदम लियो भन्ने कुरा को छानबिन राम्रोसँग गरियोस् र पुलिसले फोन डिटेल्स (विवरण) प्रस्ट अगाडि ल्याउनुहुन अनुरोध गर्दछु ।"

३१ वर्षीय सारुक असार २१ गते राति काठमाडौं रातोपुलस्थित आफ्नै निवासमा मृत अवस्थामा भेटिएका थिए । उनका बुवा सानु ताम्राकारको भदौ ९ गते उपचारका क्रममा निधन भएको थियो ।