काठमाडौं । गायक प्रकाश सपूतले राजनीति गर्ने संकेत गरेका छन् । दुई वर्षपछि नयाँ यात्राको सुरुआत गर्ने भन्दै उनले राजनीतिमा प्रवेश गर्ने संकेत गरेका हुन् ।

“आउँदो वर्ष आफूलाई बच्चैदेखि रहर लागेको काम चलचित्र बनाउनेछु,” उनले भने, “त्यसपछि अहिले गरिरहेकोभन्दा भिन्नै काम गर्नेछु ।”

यो वर्ष विभेदविरुद्धका गीत गाउने बताएका उनले अर्को वर्ष चलचित्र बनाउने र त्यसपछि आफ्नो जिन्दगीको वास्तविक यात्रा सुरु गर्ने उनको भनाइ छ । प्रकाशले यो वर्ष विभेदविरुद्धका गीत गाउने अभियानअन्तर्गत ‘दमाई महाराज’ सार्वजनिक गरिसकेका छन् ।

“विभेदविरुद्धका गीत यो वर्ष गाएपछि र एउटा चलचित्र बनाएपछि मेरो जीवनको वास्तविक यात्रा सुरु हुनेछ,” प्रकाश बाह्रखरीसँग भन्छन्, “म अहिले गीत गाइरहेको छु, म्युजिक भिडियोमा अभिनय पनि गरिरहेको छु । आफ्नो करिअर र पृष्ठभूमि बलियो बनाउन आएका काम छोडेको छैन । स्टेज कार्यक्रम गरिरहेको छु । सिर्जना गरेर त्यसलाई बेचिरहेको पनि छु । आफैँलाई म केही अवसरबादी पनि भएँ भन्ने लाग्छ ।”

आफूले चरम अभाव र गरिबी भोगेर आएको भन्दै उनले पृष्ठभूमि बलियो बनाउन आफूले कुनै पनि काम नछोडेको स्पष्ट पार्छन् ।

“एक पैसा नहुँदा र एक मुठी अन्न नहुँदाको चरम अभाव पनि मैले भोगेको छु । जीवनमा मान्छे आर्थिक रूपमा पूर्ण कहिल्यै हुँदैन । तर, अब आर्थिक रूपमा अब पुग्दो छ भनेर मेरो परिवारलाई महसुस गराउनु छ,” प्रकाश अगाडि थप्छन्, “मान्छेहरू पैसाले कहिल्यै पुग्दैन भन्छन् । सुरुमा अपेक्षा गरेको जति कमाएपछि फेरि त्यसमा थप्न मन लाग्छ भन्छन् । तर, अब पुग्दो छ भन्ने भएपछि म मेरो अर्को यात्रामा लाग्नेछु । यसका लागि मैले दुई वर्ष छुट्याएको छु ।”

त्यसपछि आफूले वास्तविक यात्रा सुरु गर्ने उनी स्पष्ट पार्छन् ।

“त्यो यात्रा राजनीतिक वा आध्यात्मिक अथवा रचनात्मक यात्रा पनि हुन सक्छ । त्यो दुई वर्ष पछि सुरु हुनेछ,” प्रकाश भन्छन्, “पहिलो सम्भावना आफ्नो सिर्जनालाई अन्तर्राष्ट्रियस्तरमा फैल्याउने अथवा समाज परिवर्तनका लागि प्रत्यक्ष भूमिका खेल्न सक्छु कि भन्ने पनि छ । अन्तर्राष्ट्रिय बजारमा सहजै पुग्नका लागि अन्तर्राष्ट्रिय बजारका चर्चित कलाकार तथा प्लेटफर्मसँग सहकार्य पनि हुनसक्छ ।”

राजनीतिमा आउने हो ?

“हो, राजनीतिमा आउने पनि मेरो सोच हो । तर, अहिले नै तय भइसकेको छैन । तर, पकेट लिस्टमा यो विषय पनि छ,” उनले जवाफमा भने ।

कुनै पार्टी विशेषमा जाने सोचाइ छ ?

“पार्टीबाट नै राजनीति गर्ने भन्ने होइन । तर, विकल्पहरूमध्ये पार्टी पनि एउटा हो । राजनीतिमा कसरी जाने ?, स्वतन्त्रबाट राजनीति गर्ने अथवा अभियान्ता भएर काम गर्ने हो, पछि तय हुन्छ,” उनी भन्छन् ।