काठमाडौं । काठमाडौं महानगरपालिकाका मेयर बालेन शाहको सचिवालयले चरित्र हत्या गरेको भन्दै एकजना ट्राफिक प्रहरी बालेन निवास पुगेका छन् । 

प्रहरी नायब निरीक्षक (सई) सुशील न्यौपानले गए राति बालेनकी श्रीमती सबिना काफ्ले सवार गाडी जाँच गरेका थिए । सार्वजनिक बिदाको दिन सरकारी गाडी चलाएको पाइएपछि उनले काफ्ले सवार गाडी चेक गरेका थिए ।

त्यसपछि बालेनले सामाजिक सञ्जालमार्फत आक्रोश पोखेका थिए । उनले आगामी दिनमा महानगरका गाडी सरकारबाट रोकिए 'सिंहदरबारमा आगो लगाइदिने' धम्की दिएका थिए । त्यसपछि बालेनको अभिव्यक्तिलाई लिएर आलोचना भइरहेको छ ।

आइतबार बालेनको सचिवालयले एक विज्ञप्ति जारी गर्दै बालेनको बचाउ गरेको थियो । सचिवालयले ड्युटीमा रहेका ट्राफिक प्रहरीले मादक पदार्थ सेवन गरेर असभ्य व्यवहार गरेको बताएको छ । चेकिङमा खटिएका ट्राफिक प्रहरीले मादक पदार्थ, गुट्खालगायत सुर्तीजन्य पदार्थ सेवन गर्ने, सवारीसाधन जाँच गर्दा रुखो बोलेर हप्काइदप्काइ गरेको सचिवालयको दाबी छ ।

“कर्तव्य पालनाका क्रममा मादक पदार्थ, गुट्खालगायत सुर्तीजन्य पदार्थ सेवन गर्ने, सवारीसाधन जाँच गर्दा रुखो बोलेर हप्काइदप्काइ गर्ने व्यवहार भयो । कानुनको उल्लङ्घन भएको भए चिट काटेर आवश्यक कारबाही गर्ने वैधानिक बाटो छोडेर सबिना काफ्लेलाई अस्वभाविक प्रश्न गरिएको थियो ।”

तर, ड्युटीमा रहेका न्यौपाने आफूले मादक पदार्थ सेवन नगरेको र कुनै प्रकारको दुर्व्यवहार नगरेको भन्दै आइतबार साँझ बालेन निवास पुगेका हुन् । उनी आमालाई साथमा लिएर बालेनको घर गएका थिए ।

तर, बालेन श्रीलंका उडिसकेका छन् । न्यौपाने घरमा आएपछि बालेनका आफन्तले उल्टै प्रहरी बोलाएका थिए । ‍त्यसपछि बानेश्वर प्रहरीले न्यौपानेलाई बालेनको घरबाट नियन्त्रणको शैलीमा ल्याएको बानेश्वर वृत्तका एक प्रहरी अधिकारीले बताए ।

"उहाँ (सई न्यौपाने) बालेनलाई भेट्न भनेर जानुभएको रहेछ । तर, बालेनको परिवारले उल्टै प्रहरी बोलाइदियो । ल्याउने क्रममा उहाँ रुँदै हुनुहुन्थ्यो," स्रोतले भन्यो ।

न्यौपानले आफूले एक मिनेटजति मात्र गाडी रोकेको पनि बताएका छन् । तर, बालेनको सचिवालयले सडक किनारमा ७ मिनेट गाडी रोकिएको दाबी गरेको छ ।

अहिले न्यौपानले बानेश्वर वृत्तमै छन् ।