काठमाडौं । नेकपा (माओवादी केन्द्र)का उपाध्यक्ष एवं प्रवक्ता अग्निप्रसाद सापकोटाले चीनले जारी गरेको नयाँ नक्साबारे कूटनीतिक पहल गर्नुपर्ने बताएका छन् ।

शुक्रबार पेरिसडाँमा आयोजित पत्रकार सम्मेलनमा उनले भने, “चीनले जारी गरेको नयाँ नक्सामा किन त्यस्तो हुन गयो ? कसरी धेरै महत्वपूर्ण विषयलाई समेटिएन ? त्यस बारेमा त कूटनीतिक कुरा गर्नुपर्छ ।”

उनले प्रधानमन्त्री पुष्पकमल दाहाल 'प्रचण्ड'को चीन भ्रमणका बेला कुराकानी हुनेसमेत बताएका छन् ।

“हाम्रा पार्टीका अध्यक्ष तथा प्रधानमन्त्री चीन भ्रमणमा जाँदै हुनुहुन्छ । त्यसबेलामा कुराकानी हुन्छ । यसबारेमा सरकार प्रष्ट हुँदै जनतालाई प्रष्ट पार्नुपर्छ,” सापकोटाले भने ।

चीनले सोमबार जारी गरेको नयाँ नक्सामा नेपाली भूमि कालापानी, लिपुलेक र लिम्पियाधुरा समेटिएको चुच्चे नक्सा समावेश नभएको भन्दै विरोध भइरहेको छ ।

नेपालको भूमि भारतभित्र देखाएको भन्दै काठमाडौं महानगरपालिकाका मेयर बालेन शाहले त्यसको विरोध स्वरुप चीन भ्रमण रद्द गरेका छन् ।

प्रधानमन्त्री चीन भ्रमण जाँदै छन् ।