काठमाडौं । चालु आर्थिक वर्ष २०८०/०८१ को पहिलो महिना साउनमा वैदेशिक रोजगारीमा जानेको संख्या घटेको छ ।

अघिल्लो आर्थिक वर्ष २०७९/०८० को सोही महिनाको तुलनामा गत साउनमा नेपालबाट वैदेशिक रोजगारीमा जानेको संख्या घटेको हो ।

वैदेशिक रोजगार विभागका अनुसार २०८० साउन महिनामा ५५ हजार ५७५ जना नेपालीले वैदेशिक रोजगारीमा जान विभागबाट श्रम स्वीकृति लिएका छन् ।

श्रम स्वीकृति लिनेमध्ये ४७ हजार ८५० जना पुरुष र सात हजार ७२५ जना महिला रहेका छन् ।

अघिल्लो आर्थिक वर्ष २०७९÷०८० को साउनमा ६३ हजार ३९ जना वैदेशिक रोजगारीमा गएका थिए । जानेमध्ये ५६ हजार ७९७ जना पुरुष र ६ हजार २४२ जना महिला रहेका थिए ।

गत असार महिनाको तुलनामा साउन महिनामा वैदेशिक रोजगारीमा जानेको संख्या भने बढेको छ । २०८० असारमा ५५ हजार २९९ जना श्रम स्वीकृति लिइ वैदेशिक रोजगारीमा गएका थिए ।

२०८० साउनमा सबैभन्दा बढी क्रमशः युनाइटेड अरब इमिरेट्स (यूएई), कतार, साउदी अरब र मलेसिया जान श्रम स्वीकृति लिएका छन् ।

विभागका अनुसार उक्त महिना यूएई जान ११ हजार ८७८, कतार जान १० हजार ५६१, साउदी जान १० हजार ३० जना र मलेसिया जान ९ हजार २६८ जनाले श्रम स्वीकृति लिएका छन् ।

गत साउन महिनामा ९३ देशमा जान नेपालीले श्रम स्वीकृति लिएका छन्। श्रम स्वीकृति लिनेमध्ये ७५.१० प्रतिशतले यूएई, कतार, साउदी र मलेसिया रोजेका छन् ।