काठमाडौं । धितोपत्र दोस्रो बजारमा कारोबार गर्ने लगानीकर्ताले दुई दिनमै ५२ अर्ब १५ करोड रुपैयाँ गुमाएका छन् । लगानीकर्ताको सम्पत्ति भनेर बुझिने कुल बजार पुँजीकरण आइतबार र सोमबार ५२ अर्बभन्दा बढीले घटेको हो ।

गएको बिहीबार ३० खर्ब ४३ अर्ब रुपैयाँ रहेको कुल बजार पुँजीकरण सोमबार २९ खर्ब ९० अब ८५ करोड रुपैयाँ कायम भएको छ ।

आज धितोपत्र दोस्रो बजार मापक नेप्से परिसूचक घटेको छ । नेप्से १२.९३ अंकले घटेर दुई हजार ९९८ विन्दुमा बन्द भएको हो । आइतबार करिब २२ अंकले घटेको थियो ।

कारोबारमा आएका १३ वटै समूहको परिसूचक घटेको छ । सर्वाधिक परिसूचक घट्नेमा हाइड्रोपावर समूह छ । यो समूहको परिसूचक १.४० प्रतिशतले घटेको छ ।

सोमबार २७२ धितोपत्रका ४१ लाख ६३ हजार ८७२ कित्ता सेयर एक अर्ब ४० करोड ८९ लाख रुपैयाँमा खरिद–बिक्री भएको छ । सर्वाधिक रुपैयाँको सेयर कारोबार शिवम् सिमेन्टको भएको छ । यो कम्पनीको आठ करोड दुई लाख ४७ हजार रुपैयाँको सेयर कारोबार भएको छ ।

कुथेली बुखरी स्मल हाइड्रोपावर लिमिटेड र लक्ष्मी लघुवित्त वित्तीय संस्थाको सेयर मूल्य १० प्रतिशतले वृद्धि भएको छ । लक्ष्मी लघुवित्तको सेयर मूल्य प्रतिकित्ता ६६ रुपैयाँ २० पैसा र कुथेली बुखरी स्मल हाइड्रोपावरको सेयर मूल्य प्रतिकित्ता ४७ रुपैयाँ ९० पैसाले वृद्धि भएको छ ।

मेन्छियाम हाइड्रोपावर लिमिटेडको सेयर मूल्य ७.९९ अर्थात् १५ रुपैयाँ १० पैसाले घटेको छ ।