काठमाडौं । गाडी भाडामा लिन सकिने तथा आफ्नो गाडी भाडामा लगाएर आम्दानी गर्न सकिने ‘सजिलो रेन्टल’ एप र वेबसाइट सञ्चालनमा ल्याइएको छ ।

सजिलो रेन्टल एपबाट व्यक्तिले आफ्नो आवश्यकताअनुसार त्यहाँ उपलब्ध गाडी छानेर भाडामा लिन सक्ने कम्पनीले जनाएको छ ।

यस्तै, आफ्नो गाडी हुनेहरूले सजिलो रेन्टलमा गाडी भाडामा लगाएर आम्दानी पनि गर्न सक्ने सजिलो रेन्टलका प्रमुख कार्यकारी अधिकृत (सीईओ) दामोदर फुयाँलले जानकारी दिए ।

सजिलो रेन्टलमा बस, कार, कोस्टर, हाइस, जीप, पिकअप, टाटासुमो र मोटरसाइकल ‘होस्ट’ गर्न सकिने अथवा भाडामा लगाउन सकिन्छ । यी नै सवारी भाडामा लिन चाहने व्यक्तिले पनि सजिलो रेन्टलबाट सेवा लिन सक्ने उनले बताए ।

सजिलो रेन्टलबाट न्यूनतम चार घण्टाका लागि गाडी भाडामा लिन सकिन्छ । सजिलो रेन्टलले काठमाडौं उपत्यकासँगै पोखरा, धनगढी, नेपालगन्ज बुटवल, चितवन, धरान, हेटौँडा र इटहरीमा सेवा दिन थालेको सीईओ फुयाँलले बताए ।

कुनै ठाउँमा घुम्न जानुपरेमा, विमानस्थल वा बसपार्क आवतजावत गर्नुपरेको अवस्थामा, विवाह र अरू उत्सव एवं समारोहजस्ता कामका लागि सजिलो रेन्टलबाट गाडी बुक गर्न सकिने उनको भनाइ छ ।

यस्तै, आफूसँग गाडी हुनेहरूले त्यसलाई सजिलो रेन्टलमा होस्ट गरेर अथवा भाडामा लगाएर आम्दानी गर्न सक्छन् ।

सजिलो रेन्टल डटकम वेबसाइट र गुगल प्लेस्टोर एवं एप स्टोरबाट एप डाउनलोड गरेर सजिलो रेन्टलको सेवा लिन सकिन्छ ।

गाडी भाडामा लिने/दिने मात्र नभइ सजिलो रेन्टलमा सिट समेत सेयर गर्न सकिने ‘कारपुल’ सुविधा उपलब्ध गराइएको छ । यसअन्तर्गत कुनै पनि व्यक्तिले आफ्नो गाडीको खाली सिट र जाने ठाउँको विवरण त्यहाँ राख्न सक्छन् । आवश्यक परेका व्यक्तिले उक्त सिटका लागि एपबाटै अनुरोध गर्न सक्छन् ।

कारपुल सुविधामा भाडा भने आपसी समझदारीमा लिन/नलिन सकिने कम्पनीले जनाएको छ ।

ग्राहकको सुरक्षाका लागि बिमा र अरू योजनामा काम गरिरहेको सजिलो रेन्टलले जनाएको छ ।

कम्पनीका अनुसार सवारी लाइसेन्स, बिमालगायत कागजात पुष्टि गरेर मात्र सेवा लिनदिन सकिनेछ ।