काठमाडौं । नेकपा (माओवादी केन्द्र)का सांसद देवेन्द्र पौडेलले सुन तस्करी प्रकरणमा छानबिनको निष्कर्ष चित्त नबुझे मात्रै संसदीय समितिको माग गर्न प्रतिपक्षी नेकपा (एमाले)लाई आग्रह गरेका छन् । 

आजको प्रतिनिधिसभा बैठकको आकस्मिक समयमा बोल्दै उनले अर्को छानबिन समिति बनाउँदा प्रश्न उठ्ने बताए । 

“जुन ठाउँबाट छानबिन भएको छ, त्यो छानबिनको प्रक्रियालाई निष्कर्षमा पुग्न दिऔँ,” पौडेलले भने, “चित्त बुझेन भने समितिको माग गर्न सक्नुहुन्छ । भइरहेको छानबिनलाई विषयान्तर नगरौँ ।”

सरकारको राम्रा कामलाई राम्रा भन्न उनको आग्रह छ । “यो प्रकरणलाई सहयोग गर्न कसले छेक्यो ?  राम्रो कामलाई त राम्रो भन्नुपर्‍यो नि,” पौडेलले भने ।

उनले कुनै पनि नियमावलीमा प्रतिपक्षको सदन भनेर नलेखेको बताए । सदन सबैको भएको भन्दै त्यसैअनुसार अघि बढ्न सभामुखलाई आग्रह गरे ।

भ्रष्टाचारको अनुहार, भूगोल, दल समेत नहुने उनको भनाइ छ । संविधानमा व्यवस्था भएका निकायलाई सक्रिय बनाएर सुशासनको प्रत्याभूति दिलाउन गरेको सरकारको कामलाई धन्यवाद दिन उनले आग्रह गरे ।