काठमाडौं । गत आर्थिक वर्ष २०७९/८० को अन्त्यसम्म नेपाल बैंक लिमिटेडले तीन अर्ब ४१ करोड १५ लाख रुपैयाँ नाफा आर्जन गरेको छ । शनिबार सार्वजनिक गरेको अपरिष्कृत वित्तीय विवरण अनुसार बैंकको नफा अघिल्लो वर्षको तुलनामा १६.७० प्रतिशतले वृद्धि भएको हो । 

अघिल्लो वर्ष बैंकले दुई अर्ब ९२ करोड ३२ लाख रुपैयाँ नाफा आर्जन गरेको थियो । अघिल्लो वर्षको तुलनामा खुद ब्याज आम्दानी र खुद फि तथा कमिशन वृद्धि भएसँगै नाफा वृद्धिमा टेवा पुगेको हो । खुद ब्याज आम्दानी ४०.६१ प्रतिशतले बढेको छ भने फि तथा कमिशनबाट प्राप्त हुने आम्दानी ३.८३ प्रतिशतले वृद्धि भएको छ । 

गत वर्ष खुद ब्याज आम्दानीबाट बैंकले नौ अर्ब ४४ करोड १५ लाख रुपैयाँ आर्जन गरेको छ । अघिल्लो वर्ष बैंकले यो शीर्षकमा ६ अर्ब ७१ करोड ४५ लाख रुपैयाँ आर्जन गरेको थियो । 

गत वर्ष फि तथा कमिशनबाट बैंकले ९२ करोड आठ लाख रुपैयाँ आम्दानी भएको छ भने अघिल्लो वर्ष ८८ करोड ६९ लाख रुपैयाँ आम्दानी गरेको थियो । 

सञ्चालन मुनाफा अघिल्लो वर्षको तुलनामा २१.१९ प्रतिशतले बढेको छ । गत वर्षको अन्त्यसम्म बैंकले सञ्चालन मुनाफाबापत चार अर्ब ४० करोड ८२ लाख रुपैयाँ आर्जन गरेको छ । अघिल्लो वर्ष बैंकले तीन अर्ब ६३ करोड ७४ लाख रुपैयाँ खुद सञ्चालन मुनाफा गरेको थियो । 

बैंकको खराब कर्जा भने १.०२ प्रतिशत विन्दुले वृद्धि भएको छ । गत आर्थिक वर्षको अन्त्यसम्म बैंकको खराब कर्जा २.८५ प्रतिशत पुगेको छ । अघिल्लो वर्ष खराब कर्जा १.८३ प्रतिशत थियो । 

त्यस्तै बैंकको कर्जा लगानी ४.३२ प्रतिशतले बढेको छ । गत वर्षको अन्त्यसम्म एक खर्ब ७८ अर्ब ८ करोड ८६ लाख रुपैयाँ कर्जा लगानी भएको छ । अघिल्लो वर्ष एक खर्ब ७१ अर्ब ४ करोड पाँच लाख कर्जा लगानी गरेको थियो । 

निक्षेप संकलन २४.७२ प्रतिशतले वृद्धि भएको छ । गत वर्ष बैंकले दुई खर्ब ४४ अर्ब ५४ करोड रुपैयाँ निक्षेप संकलन गरेको छ । अघिल्लो वर्ष भने बैंकले एक खर्ब ९६ अर्ब सात करोड रुपैयाँ निक्षेप संकलन गरेको थियो । 

कम्पनीको वितरणयोग्य मुनाफा भने घटेको छ । गत वर्षको अन्त्यसम्म बैंकको वितरणयोग्य मुनाफा ७१.५६ प्रतिशतले घटेको छ । गत वर्षको अन्त्यसम्म बैंकको वितरणयोग्य मुनाफा ९७ करोड ३३ लाख छ भने अघिल्लो वर्ष यस्तो नाफा तीन अर्ब ४२ करोड रुपैयाँ थियो । गत वर्षको वितरणयोग्य मुनाफा अनुसार बैंकले सेयरधनीलाई प्रतिसेयर ६.६२ प्रतिशत लाभांश वितरण गर्न सक्छ । अघिल्लो वर्ष यस्तो क्षमता २३.७६ प्रतिशत थियो । एक वर्षमा १७.१४ प्रतिशतले लाभांश क्षमता घटेको छ ।

बैंकको वार्षिक प्रतिसेयर आम्दानी २३ रुपैयाँ २२ पैसा रहेको छ भने प्रतिसेयर नेटवर्थ २४८ रुपैयाँ ९४ पैसा छ । त्यस्तै कम्पनीको चुक्तापुँजी १४ अर्ब ६९ करोड ४० लाख २२ हजार रुपैयाँ रहेको छ । बैंकले जगेडा कोषमा २० अर्ब ९१ करोड १४ लाख रुपैयाँ सञ्चित गरेको छ ।

यो वर्ष बैंकको लागत १.०३ प्रतिशत विन्दुले बढेको छ । अघिल्लो वर्ष ५.९४ प्रतिशत रहेको लागत गत वर्ष ६.९७ प्रतिशत कायम भएको छ । बेसरेट १.९३ प्रतिशत विन्दुले बढेको छ । स्प्रेडदर भने १.१३ प्रशितल विन्दुले घटेको छ । गत वर्षको अन्त्यसम्म बैंकको स्प्रेडदर ३.९५ प्रतिशत र बेसरेट ९.९२ प्रतिशत रहेको छ ।