काठमाडौं । कृषि विकास बैंकले गत आर्थिक वर्ष २०७९/८० को अन्त्यसम्म तीन अर्ब नौ करोड ९३ लाख रुपैयाँ नाफा आर्जन गरेको छ । शनिबार सार्वजनिक गरेको अपरिष्कृत वित्तीय विवरण अनुसार अघिल्लो वर्षको तुलनामा खुद नाफा ३९.२५ प्रतिशतले वृद्धि भएको हो ।

अघिल्लो वर्ष बैंकले दुई अर्ब २२ करोड ५७ लाख रुपैयाँ नाफा आर्जन गरेको थियो । अघिल्लो वर्षको तुलनामा खुद ब्याज आम्दानी र खुद फि तथा कमिशनबाट प्राप्त हुने आम्दानी घटेको छ । खुद ब्याज आम्दानी ३.३० प्रतिशतले घटेको छ । फि तथा कमिशनबाट प्राप्त हुने आम्दानी १९.०३ प्रतिशतले घटेको छ । 

गत वर्ष खुद ब्याज आम्दानीबाट बैंकले आठ अर्ब आठ करोड चार लाख रुपैयाँ आर्जन गरेको छ । अघिल्लो वर्ष बैंकले यो शीर्षकमा आठ अर्ब ३५ करोड ५९ लाख रुपैयाँ आर्जन गरेको थियो । 

सञ्चालन मुनाफामा वृद्धि हुँदा बैंकको नाफा वृद्धिमा सहयोग पुगेको छ । सञ्चालन मुनाफा अघिल्लो वर्षको तुलनामा २६.०७ प्रतिशतले बढेको छ । गत वर्षको अन्त्यसम्म बैंकले सञ्चालन मुनाफाबापत चार अर्ब ५४ करोड ४२ लाख रुपैयाँ आर्जन गरेको छ । अघिल्लो वर्ष बैंकले तीन अर्ब ६० करोड ४४ लाख रुपैयाँ खुद सञ्चालन मुनाफा गरेको थियो । 

बैंकको खराब कर्जा भने ०.३९ प्रतिशत विन्दुले वृद्धि भएको छ । गत आर्थिक वर्षको अन्त्यसम्म बैंकको खराब कर्जा २.४८ प्रतिशत पुुगेको छ । अघिल्लो वर्ष खराब कर्जा २.०९ प्रतिशत थियो । 

गत वर्ष फि तथा कमिशनबाट एक अर्ब २२ करोड ११ लाख रुपैयाँ आम्दानी भएको छ भने अघिल्लो वर्ष एक अर्ब ५० करोड ८० लाख रुपैयाँ आम्दानी गरेको थियो । 

त्यस्तै बैंकले गर्दै आएको कर्जा लगानी पनि ०.९३ प्रतिशतले घटेको छ । गत वर्षको अन्त्यसम्म एक खर्ब ७१ अर्ब ६९ करोड ९१ लाख रुपैयाँ कर्जा लगानी भएको छ । अघिल्लो वर्ष एक खर्ब ७३ अर्ब ३१ करोड ४९ लाख कर्जा लगानी गरेको थियो । 

निक्षेप संकलन भने १९.७५ प्रतिशतले वृद्धि भएको छ । गत वर्ष बैंकले एक खर्ब ९९ अर्ब ४८ करोड रुपैयाँ निक्षेप संकलन गरेको छ । अघिल्लो वर्ष भने बैंकले एक खर्ब ६६ अर्ब ५९ करोड रुपैयाँ निक्षेप संकलन गरेको थियो । 

कम्पनीको वितरणयोग्य मुनाफा घटेको छ । गत वर्षको अन्त्यसम्म वितरणयोग्य मुनाफा ४३.०१ प्रतिशतले घटेको छ । गत वर्षको अन्त्यसम्म बैंकको वितरणयोग्य मुनाफा दुई अर्ब ७१ लाख रुपैयाँ रहेको छ भने अघिल्लो वर्ष यस्तो नाफा तीन अर्ब ५२ करोड १७ लाख रुपैयाँ थियो । गत वर्षको वितरणयोग्य मुनाफा अनुसार बैंकले सेयरधनीलाई प्रतिसेयर १९.८९ प्रतिशत लाभांश वितरण गर्न सक्छ । अघिल्लो वर्ष यस्तो क्षमता ३५.६१ प्रतिशत थियो ।

बैंकको प्रतिसेयर आम्दानी २० रुपैयाँ ६२ पैसा रहेको छ । त्यस्तै कम्पनीको चुक्तापुँजी १८ अर्ब ८८ करोड ४३ लाख ८६ हजार रुपैयाँ रहेको छ । बैंकले जगेडा कोषमा ११ अर्ब ७२ करोड ९७ लाख रुपैयाँ सञ्चित गरेको छ । यो वर्ष बैंकको लागत र बेसरेट बढेको छ भने स्प्रेडदर भने घटेको छ । यो बैंकको स्प्रेडदर गत वर्ष ०.४३ प्रशितल विन्दुले घटेको छ भने लागत ०.६२ प्रतिशत विन्दु र बेसरेट १.१६ प्रतिशत विन्दुले वृद्धि भएको छ । 

गत वर्षको अन्त्यसम्म बैंकको लागत ७.५१ प्रतिशत, स्प्रेडदर ३.९४ प्रतिशत र बेसरेट १०.०६ प्रतिशत रहेको छ ।