काठमाडौं । पछिल्लो एक वर्षमा नेपालले विभिन्न देशबाट एक अर्ब दुई करोड ९८ लाख एक हजार रुपैयाँको सिफुड आयात गरेको छ । 

भन्सार विभागका अनुसार गत आर्थिक वर्ष २०७९/०८० मा नेपालले उक्त रकम बराबरको सिफुड आयात गरेको हो । 

२०७९ साउन १ गतदेखि २०८० असार मसान्तसम्मको अवधिमा उक्त रकममा ३७ लाख ३१ हजार ८३४ केजी सिफुड नेपाल भित्रिएको विभागको तथ्यांकले देखाउँछ । 

क्याटफिस, कार्प, सालमोन, टुना, अक्टुपस, प्राउन, गँगटो लगायतका सिफुड नेपालले आयात गर्दै आएको छ । 

भारत, थाइल्याण्ड, डेनमार्क, भियतनाम, मलेसिया, नर्वे, युनाइटेड अरब इमिरेट्स, चीन, बंगलादेश, जापान, हङकङ, दक्षिण कोरिया, सिंगापुर र म्यानमारबाट नेपालले सिफुड आयात गर्ने गरेको छ । 

अघिल्लो आर्थिक वर्ष २०७८/०७९ मा नेपालले विभिन्न देशबाट एक अर्ब ३४ करोड ६५ लाख ८० हजार रुपैयाँको सिफुड आयात गरेको थियो । उक्त रकममा ४९ लाख ६६ हजार ३३८ केजी सिफुड नेपाल भित्रिएको थियो ।