![नेप्सेले दियो थप सात ब्रोकरलाई सदस्यता](https://12khari.top/uploads/posts/Nepal-Stock-exchange1660732125.jpg)
काठमाडौं । नेपाल स्टक एक्सचेन्ज (नेप्से)ले थप सात नयाँ ब्रोकर कम्पनीलाई सदस्यता प्रदान गरेको छ ।
नेपाल धितोपत्र बोर्डबाट दोस्रो चरणमा आशयपत्र प्राप्त गरेका ११ कम्पनीहरूमध्ये १० कम्पनीलाई नेप्सेले आशयपत्र प्रदान गरेको थियो ।
तीमध्ये सात कम्पनीलाई आज (शुक्रबार) सदस्यता प्रदान गरेको हो । यसअघि नेप्सेले सातवटा नयाँ ब्रोकर कम्पनीलाई सदस्यता दिइसकेको छ ।
नेप्सेबाट पछिल्लो समय १४ वटा नयाँ कम्पनीले ब्रोकर लाइसेन्स पाएका छन् । नेप्सेका प्रवक्ता मुराहरी पराजुलीका अनुसार आज सात कम्पनीले सदस्यता प्राप्त गरेका छन् । सदस्य पाउनेमा एलिट स्टक हाउस, इन्फिनिटी सेक्युरिटिज, इन्डेक्स सेक्युरिटिज, शुभकामना सेक्युरिटिज, हातेमालो फाइनान्सियल सर्भिसेस, मनि वल्र्ड सेयर एक्सचेन्ज र कलश स्टक मार्केट रहेका छन् ।
यी कम्पनीहरूसँगै आशयपत्र प्राप्त गरेका नबिल सेक्युरिटिज, मेगा स्टक मार्केट्स र माछापुच्छ्रे सेक्युरिटिजले भने सदस्यताको पखाईमै रहेका छन् । यी कम्पनीहरूले आवश्यक कागजात पुरा गर्न बाँकी रहेकाले सदस्यता प्राप्त नगरेका हुन् ।
नबिल सेक्युरिटिज एक अर्ब ५० करोड रूपैयाँ चुक्तापुँजी भएको स्टक डिलरको सेवा प्रदान गर्ने ब्रोकर रहेको छ । मेगा स्टक मार्केट ६० करोड रूपैयाँ चुक्तापुँजी भएको सेयर खरिद–बिक्री गर्नेसँगै डीपीको रूपमा काम गर्ने, लगानी परामर्श सेवा एवं लगानी व्यवस्थापन गर्ने र मार्जिन कारोबार सेवासमेत दिने पूर्ण दायरासहितको दोस्रो तहको ब्रोकर कम्पनी हो ।
माछापुच्छ्रे सेक्युरिटिज भने २३ करोड रूपैयाँ चुक्तापुँजी भएको सीमित कार्य गर्ने ब्रोकर कम्पनी हो । नेप्सेको सदस्यता पाउने थप सात कम्पनी पनि पहिलो तहको सीमित कार्य गर्ने कम्पनीहरूमा रहेका छन् ।
यसअघि नेप्सेले पहिलो तहको सीमित कार्य गर्ने सात कम्पनीलाई सदस्यता प्रदान गरेको थियो । ती कम्पनीहरूले असारदेखिनै धितोपत्र बजारमा प्रवेश गरी कारोबार सुरू गरिसकेका छन् । हालसम्म नेपाल धितोपत्र बोर्डले तीन चरणमा २९ कम्पनीलाई ब्रोकर लाइसेन्स प्रदान गरिसकेको छ । बोर्डको लाइसेन्स प्राप्त गरेका सबै कम्पनीले नेप्सेको समेत सदस्यता लिनुपर्ने व्यवस्था छ ।