काठमाडौं । पूर्वअर्थमन्त्री एवं नेकपा (एमाले)का उपाध्यक्ष विष्णुप्रसाद पौडेलले राष्ट्र बैंकले मौद्रिक नीति ल्याउँदा लचिलोपनसहित अर्थतन्त्रका चुनौती सामना गर्ने गरी ल्याउन सुझाव दिएका छन् ।

बिहीबार प्रतिनिधिसभाको अर्थ समितिको बैठकमा बोल्दै पूर्वअर्थमन्त्री पौडेलले आगामी मौद्रिक नीति कसिलो र लचिलो मौद्रिक नीति आउनुपर्ने बाहिर चर्चा भइरहेको बताए । 

कसिलो र लचिलो मौद्रिक नीतिलाई गाई कि त्रिशुल भनेको जस्तो छान्न सकिने विषय नभएको बताउँदै उनले विगतको मौद्रिक नीति सकारात्मक रहेको र विगतको मौद्रिक नीतिको सापेक्षित निरन्तरतासहित अहिलेको अर्थतन्त्रलाई सामना गर्न सक्ने मौद्रिक नीति राष्ट्र बैंकले ल्याउनुपर्ने बताए ।

आवश्यक मात्रामा लचिलो बनेर मौद्रिक नीति आउनुपर्ने उनले बताए । उनले अर्थतन्त्रमा देखिएका नतिजा विगतको मौद्रिक नीतिको प्रभाव भएको भन्ने परीक्षण पछिल्ला आँकडाहरुले दिएको बताए ।

“अर्थ मन्त्रालय र राष्ट्र बैंकका बीचमा हार्दिक र घनिष्ट र कामकाजी सम्बन्ध होस् । अर्थ मन्त्रालय र राष्ट्र बैंकका बीच अन्तरविरोध र असमझदारी छ भन्ने समाजमा सम्प्रेसन नहोस्,” उनले भने, “यस्तो भएमा मुलुकको अर्थतन्त्रमा नयाँ समस्या सिर्जना गर्छ ।”

दुई निकायबीच सम्बन्ध नराम्रो भएको सन्देशले मुलुकको अर्थतन्त्रलाई लयमा हिँडाउनको निम्ती चुनौती सिर्जना गर्ने बताए । अर्थ मन्त्रालय र राष्ट्र बैंकका बीच अन्तरविरोध र असमझदारी हुन नहुने भन्दै यस्तो भएमा मुलुकको अर्थतन्त्रमा नयाँ समस्या सिर्जना गर्ने पनि दाबी गरे ।