काठमाडौं । पछिल्लो आठ वर्षमा विभिन्न देशबाट नेपालमा दुई खर्ब ३५ अर्ब ४५ करोड २० लाख ४३ हजार रुपैयाँको सुन भित्रिएको पाइएको छ । 

भन्सार विभागका अनुसार उक्त रकममा ३९ हजार ९१५.९ केजी सुन नेपाल भित्रिएको छ । यो आँकडा वैधरूपमा नेपाल भित्रिएको सुनको मात्र हो । 

आर्थिक वर्ष २०७२/०७३ देखि २०७९/०८० सम्म उक्त सुन नेपाल भित्रिएको विभागले जनाएको छ । यसमा ढिक्का सुन, कच्चा सुन र सुनका गहना सबै जोडिएको छ । 

गत आर्थिक वर्ष २०७९/०८० को पहिलो ११ महिनामा मात्र नेपालले साढे ४४ अर्ब रुपैयाँभन्दा बढीको सुन आयात गरेको छ । 

भन्सार विभागको तथ्यांकअनुसार आर्थिक वर्ष २०७९/०८० मा नेपालले ४४ अर्ब ६६ करोड ८५ लाख ६१ हजार रुपैयाँमा तीन हजार ४९३.४४ केजी सुन आयात गरेको छ । 

अघिल्लो आर्थिक वर्ष २०७८/०७९ मा ४३ अर्ब ६७ करोड ८७ लाख ८८ हजार रुपैयाँ खर्चेर नेपालले पाँच हजार ६२७.२९ केजी सुन आयात गरेको थियो । 

यस्तै, आर्थिक वर्ष २०७७/०७८ मा २७ अर्ब ७१ करोड दुई लाख २६ हजार रुपैयाँमा तीन हजार ९९६.३७ केजी र आर्थिक वर्ष २०७६/०७७ मा १३ अर्ब ६९ करोड ६८ लाख सात हजार रुपैयाँमा दुई हजार ४५३ केजी सुन आयात गरेको विभागले जनाएको छ । 

आर्थिक वर्ष २०७५/०७६ मा ३४ अर्ब ६३ करोड ७७ लाख ४८ हजार रुपैयाँमा सात हजार ४९८.८ केजी र आर्थिक वर्ष २०७४/०७५ मा ३१ अर्ब ७४ करोड ८७ लाख ६९ हजार रुपैयाँमा हजार २३२ केजी सुन नेपालले आयात गरेको देखिन्छ । 

आर्थिक वर्ष २०७३/०७४ मा नेपालले २३ अर्ब २३ करोड १६ लाख २९ हजार रुपैयाँमा पाँच हजार ४५० केजी सुन आयात गरेको थियो ।  

आर्थिक वर्ष २०७२/०७३ मा १६ अर्ब सात करोड ९५ लाख १५ हजार रुपैयाँमा चार हजार १६५ केजी सुन नेपाल भित्रिएको थियो । 

नेपालमा सबैभन्दा ठूलो मात्रामा कच्चा र ढिक्का सुन युनाइटेड अरब इमिरेट् (यूएई), टर्की र स्वीट्जरल्याण्डबाट आउने गरेको छ । 

गत आर्थिक वर्ष २०७९/०८० को पहिलो ११ महिनामा मात्र नेपालले यूएईबाट करिब १९ अर्ब रुपैयाँको सुन आयात गरेको छ । 

अष्ट्रेलिया, बहराइन, बंगलादेश, बेल्जियम, बुल्गेरिया, कम्बोडिया, क्यानडा, चीन, फिनल्याण्ड, फ्रान्स, जर्मनी, भारत, इजरायल, जापान, दक्षिण कोरिया, कुवेत, मलेसिया, मोरक्को, ओमान, कतार, साउदी अरेबिया, सिंगापुर, थाइल्याण्ड लगायतका देशबाट नेपालले सुनका गहना आयात गर्ने गरेको छ ।