काठमाडौं । कुशल भुर्तेलले घातक बलिङ गरेपछि एसीसी मेन्स इमर्जिङ टिम्स एसिया कपमा नेपालले युनाइटेड अरब इमिरेट्स ‘ए’ बाट १५८ रनको लक्ष्य पाएको छ ।
भुर्तेलले लिस्ट ‘ए’ करियरकै उत्कृष्ट बलिङ गर्दै ६ विकेट लिएपछि बुधबार पी सारा ओभलमा टस जितेर ब्याटिङमा आएको यूएईले ४४ ओभरमा सबै विकेट गुमाएर १५७ रन बनायो ।
यूएईलाई मध्यम योगफलमा रोक्न ६ विकेट लिएका भुर्तेलले १० ओभरमा ४० रन खर्चिए । लिस्ट ‘ए’ क्रिकेटमा कुशलको यो अहिलेसम्मकै उत्कृष्ट बलिङ फिगर हो ।
यूएईले २३.५ ओभरमा ९६ रन जोड्दा दुई विकेटमात्र गुमाएको थियो । तर, त्यसपछि भुर्तेलले लगातार विकेट लिँदा यूएई १५७ रनमै समेटियो ।
यसबाहेक, श्याम ढकाल (मौसम)ले दुई विकेट लिँदा कुशल मल्ल र पवन सर्राफले समान एक विकेट लिए ।
यूएईका ओपनर नवप्रितसिंह बाज्वाले ५२ रन बनाए । इथान डिसुजाले १८, अश्वन्थ भाल्थापाले १६ र जस गियानानीले १३ रन जोडे । यसबाहेक, यूएईका अन्य ब्याटरले दोहोरो अंकमा रन जोड्न सकेनन् ।
प्रतियोगितामा दुवै टिमको यो समूह चरणको अन्तिम खेल हो । यसअघिका दुई खेलमा लगातार हार बेहोरेका कारण दुवै टिमको सेमिफाइन पुग्ने सम्भावना समाप्त भइसकेको छ । यसैकारण आजको खेलमा दुवै टिम जितसहित प्रतियोगिताको सुखद अन्त्यको लक्ष्यमा छन् ।
यसअघि, प्रतियोगिताको पहिलो खेलमा नेपाल पाकिस्तान ‘ए’सँग चार विकेटले र दोस्रो खेलमा भारत ‘ए’सँग नौ विकेटले पराजित भएको थियो ।
यता, यूएई पनि पहिलो खेलमा भारतसँग आठ विकेटले र दोस्रो खेलमा पाकिस्तानसँग १८४ रनले पराजित भएको थियो ।
प्रतियोगितामा नेपालसहित एसियाका आठ टिम सहभागी छन् । सहभागी टिमलाई दुई समूहमा विभाजन गरिएको छ ।
प्रतियोगिताको समूह ‘ए’मा ओमान, अफगानिस्तान, बंगलादेश र श्रीलंका छन् । समूह ‘बी’मा नेपाल, भारत, पाकिस्तान र युनाइटेड अरब इमिरेट्स (यूएई) छन् । प्रतियोगितामा नेपालबाहेक सबै टिमले ‘ए’ टोली पठाएका छन् ।
